د بغلان د شهيدانو او معلولينو چارو آمريت لخوا د شهيد اوونۍ ونمانځل شوه
د بغلان د شهيدانو او معلولينو چارو آمريت لخوا د شهيد اوونۍ ونمانځل شوه
د بغلان د شهيدانو او معلولينو چارو آمريت د شهيدانو روحونو د ښاد ساتلو او ثواب په نيت د قرآنکريم د ختم مراسمو ترڅنګ د شهيد اوونۍ ونمانځله.
د شهيدانو اوونۍ د نمانځنې په مراسمو کې سيمه ييزو دولتي چارواکو، د ولايتي شورا غړو، مدني فعالانو، ديني عالمانو، د شهيدانو ورثينو او معلوليت لرونکو وګړو ګډون کړی و.
د مراسمو په پيل کې د بغلان د شهيدانو او معلولينو چارو آمر لخوا، د شهيدانو او معلولينو په چارو کې د دولت وزارت محترم وزير لعل الدين آريوبي د تسليت پيغام ولوستل شو.
د ښاغلي وزير صيب پيغام کې د شهيدانو د سرښندنو، قربانيو او وياړونو يادونه شوې وه او د شهيدانو د پاکو وينو پر مټ د ګټلي عزت، خپلواکۍ، عرضي تماميت او د هېواد له لوېشت لوېشت نه د دفاع په وياړ د هغوی له قربانيو د درناوی ترڅنګ د يادو وياړونو د ساتنې غوښتنه هم شوې وه.
د ښاغلي آريوبي صيب په پيغام کې ولايتي آمرينو ته لارښوونه شوې وه، چې د شهيدانو ورثينو او معلوليت لرونکو وګړو لپاره د يوازيني مسول ادرس په توګه، د هغوی ستونزو ته پر وخت رسېدنه وکړي او د غوره ژوند اسانتياوې ورته برابرې کړي.
د مراسمو نورو ويناوالو هم د شهيدانو په ارزښت او اهميت خبرې وکړې او له نوي نسل نه يې د هغوی د لاسته راوړنو او وياړونو د ساتلو غوښتنه وکړه او ناسته د شهيدانو روحونو د ښاد او ارام ساتلو په موخه د دوعا په پار د لاسونو په پورته کولو سره پای ته ورسېده.
