د شهیدانو او معلولینو چارو په وزارت کې د کاري ظرفیت لوړولو او ادارې پراختیا لپاره نوی آمر معرفي شو
د شهیدانو او معلولینو چارو وزارت دمقام د لزوم دید او حکم پر اساس محترم مولوي سیف الدین د کارکوونکو چارو په ریاست کې د کاري ظرفیت لوړولو او ادارې پراختیا د نوي آمر په توګه، د دې وزارت د مالي او اداري چارو عمومي رئیس محترم مولوي کلیم الله افغان لخوا اړوند کارکوونکو ته په رسمي توګه معرفي او خپلې چارې يې پېل کړې.
په هغه غونډه کې چې په همدې موخه د کارکوونکو چارو په ریاست کې جوړه شوې وه، د مالي او اداري چارو عمومي رئیس محترم مولوي کلیم الله افغان، د کارکوونکو چارو رئیس محترم مولوي محمد موسی صدیقي، د استخدام آمر محترم مولوي عبدالصمد حماد، د کارکوونکو د سوانحو او ارزونې آمر محترم کریم الله فاروقي او د ریاست اړوند ټولو کارکوونکو شتون درلود.
محترم مولوي کلیم الله افغان د کاري ظرفیت لوړولو او ادارې پراختیا د نوي آمر په تېرو فعالیتونو خبرې وکړې او ویې ویل: محترم مولوي سیفالدین د شهیدانو ورثه وو او معلولینو ته د خدمتونو وړاندې کولو په برخه کې زیاته تجربه لري او تل یې خپل سپارل شوي مسؤلیتونه په پوره امانتدارۍ ترسره کړي دي.
هغه د کارکوونکو چارو ریاست له کارمندانو وغوښتل چې له نوي آمر سره د چارو په ترسره کولو کې بشپړه همکاري او همغږي ولري، څو کارونه په منظم ډول پرمخ ولاړ شي او د ادارې موخې په ښه توګه تر لاسه شي. همدارنګه یې یادونه وکړه چې د ټولو کارکوونکو همکاري د دې لامل کیږي چې مراجعینو ته غوره او مؤثر خدمتونه وړاندې شي.
محترم مولوي محمد موسی صدیقي په دې پروګرام کې د کارکوونکو چارو د ریاست د اساسي موخو په هکله هر اړخیزې خبرې وکړې او زیاته یې کړه: د کارکوونکو د چارو ریاست اساسي دنده دا ده چې بشري سرچیني داسې تنظیم کړي چې یو منظم تشکیلاتي جوړښت رامنځته شي، د وظیفوي تداخل مخنیوی وشي او په بستونو کې مسلکي، ژمن او کاري اصولو او د ادارې اړتیاوو سره سم کسان وګمارل شي، چې د هرې ادارې د پرمختګ او ودې لامل وګرځي.
د کارکوونکو چارو رئیس د بریالیو مدیرانو په ځانګړتیاوو هم خبرې وکړې او ویې ویل: بریالي مدیران خپل ټول تمرکز او پاملرنه د خپلو موخو د پرمختګ پر لور معطوفوي، ابتکار لري او خپلې دندې په بشپړې همغږۍ، مسؤلیتپذیرۍ او اخلاص سره ترسره کوي.
همداراز محترم مولوي محمد موسی صدیقي، محترم مولوي سیف الدین ته د ظرفیت لوړولو او ادارې پراختیا د نوي آمر په توګه مبارکي وویله او له هغه یې وغوښتل چې خپل ورسپارل شوي مسؤلیتونه په بشپړه همغږۍ او اخلاص سره ترسره کړي ترڅو د ادارې موخې په ښه ډول تحقق ومومي.
