د بامیان ولایت د شهیدانو او معلولینو چارو په ریاست کې د شهیدانو وارثینو او معلولیت لرونکو وګړو ته د خدمتونو د وړاندې کولو د بهیر د لا ښه والي په موخه اداري غونډه جوړه شوه
یاده غونډه د بامیانو ولایت د شهیدانو او معلولینو چارو رئیس محترم شاه ولي احمدي په مشرۍ جوړه شوې وه، په هغه کې د ریاست کارکوونکو او په ولسوالېو کې د یاد ریاست اړوند مدیرانو ګډون کړی وو.
په دې غونډه کې محترم شاه ولي احمدي د شهیدانو ورثه ؤ او معلولینو ته د ښو او غوره خدمتونو وړاندې کولو پر څرنګوالي خبرې وکړې او زیاته یې کړه: موږ ټول د خدای جل جلاله په ازموینې کې واقع شوي یو، دا یو فرصت دی چې وښیو موږ څرنګه کولای شو د ټولنې د اړمن او زیان منونکي قشر ستونزې حل کړو، او د شهیدانو او معلولینو چارو وزارت رهبرۍ تل په دې ټینګار کوي د هغو کسانو سره چې د کورنۍ غړي یې له لاسه ورکړي یا یتیم شوي وي په زغم او مهربانۍ سره چلند وکړو.
هغه زیاته کړه: د بامیان ولایت په ولسوالیو کې شته ستونزې په تدریجي ډول حل شوي او هڅې روانې دي چې ټولو ستونزو او غوښتنو ته په بشپړه توګه رسیدګي وشي ترڅو دې اړمن قشر ته دا زمینه برابره شي چې په خوښي او خوشحالي سره ژوند وکړي.
