د شهیدانو او معلولینو چارو وزارت د معلولینو د بیا وړتیا موندنې په برخه کې د پوهاوي د کچې د لوړولو په موخه د ماشومانو د ځواکمنتیا له مؤسسې سره هوکړه لیک لاسلیک کړ.
یاد هوکړه لیک د شهیدانو او معلولینو چارو وزارت د پلان او همغږۍ رئیس ښاغلي سید محمد عظیم آغا او د ماشومانو د ځواکمنتیا د مؤسسې رئیس ښاغلي جهانزیب داودزي ترمنځ لاسلیک شو.
ټاکل شوې ده چې د یاد هوکړه لیک له مخې به د ماشومانو د ځواکمنتیا مؤسسه، معلولیت لرونکو وګړو د بیا وړتیا موندنې د څرنګوالي په اړه د پوهاوي ورکولو، په عملي برخه کې د معلولینو د ملاتړ او هغوی ته د بیړنیو مرستو د رسولو په موخه د عامه پوهاوي ملي کمپاین په بلخ، هرات، کندهار، ننګرهار او بامیانو ولایتونو کې پر لاره واچوي.
د پوهاوي دغه کمپاين چې د يادې مؤسسې له خوا به د افغانستان په پنځو ولايتونو کې په لاره واچول شي، له مخې به یې معلولين دا وړتیا ترلاسه کړي چې له خپلو استعدادونو او وړتیاو څخه کار واخلي او خپلې کورنۍ او هېواد ته د خدمت جوګه شي.
