مولوي علاؤالدین سعد د هرات ولایت د شهیدانو او معلولینو چارو ریاست د وارسي کوونکي په توګه معرفي او نن یې خپله دنده پیل کړه.
د کندهار ولايت د شهيدانو او معلولينو چارو رياست مرستيال مولوي علاوءالدين سعد د شهيدانو او معلولينو چارو وزارت د حکم پر اساس د ښاغلي شيخ صاحب عبدالحکيم حقاني له خوا د هرات ولایت د شهيدانو او معلولينو چارو ریاست د وارسي کوونکي په توګه د نوموړي رياست کارکوونکو ته ور وپېژندل شو.
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني چې هرات ولایت ته د شهیدانو او معلولینو چارو ریاست د کړنو او فعالیتونو د څارنې او ارزونې په موخه سفر کړې وو، مولوي علاوالدین سعد یې د مولوي عبدالباري اخندزاده پر ځای د یاد ولایت د شهیدانو او معلولینو چارو د وارسي کوونکي په توګه کارکوونکو ته معرفي کړ.
په هغه غونډه کې چې په همدې موخه د هرات ولايت د شهيدانو او معلولينو په رياست کې جوړه شوې وه، د شهيدانو او معلولينو چارو وزارت مرستیال د نوموړي ریاست کارکوونکو ته د مولوي علاؤالدین سعد د معرفۍ کولو په ترڅ کې خبرې وکړې او زياته يې کړه: یتیمانو او معلولینو ته باید د اسلامي امارت د پلان او پالیسي سره سم غوره خدمتونه وړاندې کړل شي، تر څو له یوې خوا په دندو کې د کاري تداخل مخنېوې وشي او له بلې خوا د شهیدانو او معلولینو چارو وزارت له خوا د ورکړل شوي طرزالعمل مطابق یتیمانو، کونډو او معلولینو ته غوره خدمتونه وړاندې شي.
په دې غونډه کې مولوي علاؤالدین سعد د خبرو په ترڅ کې د اداري فساد مخنیوی او د یتیمانو او معلولینو پر وړاندې د پرتو ستونزو او ننګونو حل د خپلو مهمو موخو څخه وګڼله.
د يادونې وړ ده، چې په دې مراسمو کې د شهيدانو او معلولينو چارو وزارت د دفتر رئيس قاري شاه محمد دوست، د داخلي تفتیش رئيس مولوي احسان الله حقاني، د معلولينو چارو رئيس مولوي عبدالنافع منتفع، د پلانونو د تطبیق د څارنې او ارزونې آمر قاري سید اسحاق سعید او د هرات ولایت د دفتر رئیس هم ګډون درلود.
