د شهیدانو او معلولینو چارو وزارت د مالي او اداري چارو عمومي رئیس د خوست ولایت د شهیدانو او معلولینو چارو ریاست د ستونزو او ننګونو د حل په موخه د خوست ولایت له والي سره وکتل
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان چې د شهیدانو او معلولینو چارو ریاستونو د کړنو دارزونې په موخه لوګر، پکتیا، او خوست ولایتونو ته په سفر دې، نن د خوست ولایت د شهیدانو او معلولینو چارو ریاست تر لیدنې وروسته د دغه ولایت له والي ښاغلي الحاج مولوي محمد نبي عمري سره وکتل.
په دې کتنه کې د شهیدانو او معلولینو چارو وزارت د مالي او حسابي رئیس ښاغلي قاري محمد امین درویش، د څارنې او ارزونې، د تفتیش او همدارنګه د بشري سرچینو ریاستونو استازيو چې ښاغلي مولوي کلیم الله افغان ملتیا کوله، د خوست ولایت له والي سره په لیدنه کې د یاد ولایت د شهیدانو او معلولینو چارو ریاست د مهمو ستونزو او ننګونو په اړه هر اړخیزې خبرې اترې وکړې.
د خوست والي ښاغلي مولوي محمد نبي عمري د دغه رياست د ستونزو او ننګونو له اورېدو وروسته ژمنه وکړه، چې د یاد ولايت د شهيدانو او معلولينو چارو رياست ستونزې او ننګونې به په بشپړه توګه حل کړي.
په پام کې ده چې ښاغلې مولوي کلیم الله افغان به له خپل پلاوي سره د پکتیکا، زابل غزني او وردګو ولایتونو د شهیدانو او معلولینو چارو ریاستونو د کړنو او فعالیتونو د څرنګوالي ارزونه وکړي.
