د شهيدانو او معلولينو چارو سرپرست وزير د سمنګانو له والي سره ليدنه وکړه
د شهيدانو او معلولينو چارو سرپرست وزير د سمنګانو له والي سره ليدنه وکړه
نن سه شنبه د مرغومې په ۴مه، د شهيدانو او معلولينو چارو سرپرست وزير پوهنمل حميدالله فاروقي د سمنګانو والي ښاغلي محمد داوود کلکاني سره وکتل او د سمنګانو ولايت د شهيدانو ورثې او معلوليت لرونکو د ستونزو په تړاو يې ورسره خبرې وکړې.
ښاغلي کلکاني د وزارت له لوري د وروستيو اصلاحاتو او سيسټم جوړونې ستاينه وکړه او په سمنګانو ولايت کې يې د شهيدانو ورثې او معلولينو ستونزو د هواري غوښتنه وکړه.
ښاغلي کلکاني وويل: دا چې په سمنګانو ولايت کې د شهيدانو او معلولينو چارو آمريت ځانګړی تعمير نه لري، له همکارانو سره يو ځای حاضر يم چې د ښار جوړونې او ځمکو رياست سره په همغږۍ په دې برخه کې عملي اقدام ترسره کړم.
ښاغلي کلکاني د حقوقو په ورکړه کې ځنډ او د شهيدانو او معلولينو چارو آمريت د بشري سرچينو تشکيلاتو کموالی د سمنګانو ولايت عمده ستونزې وبللې او د حل غوښتنه يې وکړه.
د شهيدانو او معلولينو چارو وزير پوهنمل حمیدالله فاروقي د والي د راتګ او هميشنۍ همکارۍ له امله د مننې ترڅنګ، په سمنګانو ولايت کې يې د شهيدانو او معلولينو چارو آمريت سره د ولايت مقام له لوري د همغږۍ او ګډکار غوښتنه وکړه، څو د شته ستونزو په کمښت کې د مثبت بدلون سبب وګرځي.
ښاغلي فاروقي زياته کړه، که څه هم په سمنګانو ولايت کې د شهيدانو او معلولينو چارو آمريت او اسايشګاه تعمير د ساختمان جوړولو په تړاو د ښار جوړونې او ځمکو وزارت سره هوکړه شوې ده او د پلې کولو لپاره يې هڅې روانې دي.
د نوموړي په خبره، چې د شهيدانو ورثې او معلولينو لپاره د حقونو په ورکړه کې د ځنډ لامل د بودجې کمښت او د اسنادو د سمونې او کتنې بهير بشپړول دي، چې پر مټ به يې تور اسناد له سپينو جلا شي.
