د شهيدانو او معلولينو چارو وزير د افغانستان د سولې لارې د پيوستون بنسټ له غړو سره ليدنه وکړه
د شهيدانو او معلولينو چارو وزير د افغانستان د سولې لارې د پيوستون بنسټ له غړو سره ليدنه وکړه
نن سه شنبه د غويي په ۷مه، د شهيدانو او معلولينو چارو سرپرست وزير پوهنمل حميدالله فاروقي د افغانستان د سولې لارې د پيوستون بنسټ له رئيس او غړو سره ليدنه وکړه.
په پيل کې د افغانستان د سولې لارې د پيوستون بنسټ رييس د خپلو فعاليتونو او لاسته راوړنو په تړاو خبرې وکړې وويل: دغه بنسټ د سولې د ټينګښت او د هېواد وضعيت د ښه والي په موخه په بېلابېلو برخو کې خپلو هڅو ته دوام ورکوي.
همدارنګه نوموړي ژمنه وکړه، چې د شهيدانو او معلولينو چارو وزارت سره به په بېلابېلو برخو کې همکاري کوي.
د شهيدانو او معلولينو چارو سرپرست وزير پوهنمل حميدالله فاروقي، د ياد بنسټ د ښو فعاليتونو د ترسراوي له امله هغوی ته د مننې ترڅنګ وويل: جنګ زموږ په ټولنه کې يوه بده او منفي پديده ده او په هېواد کې د ټولو ستونزو سرچينه همدا ناوړه جګړه ده. د سولې د تامين او د هېواد د ابادۍ لپاره ګډو هڅو او زيات مسووليت منلو ته اړتيا ده.
نوموړي هيله مندي وښوده، چې په زده کړو سمبال ځوانان کولی شي، چې روان ناسم وضعيت ته مثبت بدلون ورکړي او د سولې د ټينګښت او د هېواد په بيارغونه کې رغنده رول ولوبوي.
په پای کې د افغانستان د سولې لارې د پيوستون بنسټ غړو ښاغلي فاروقي ته، د شهيدانو ورثې او معلوليت لرونکو وګړو لپاره د غوره او اغيزناکو خدمتونو د ترسراوي له امله ستاينليک ډالۍ کړ.
