د شهیدانو ورثې او معلولیت لرونکو وګړو ته به ژر د ځمکو د ورکړې بهیر پیل شي
د شهیدانو ورثې او معلولیت لرونکو وګړو ته به ژر د ځمکو د ورکړې بهیر پیل شي
د شهیدانو او معلولینو په چارو کې د دولت وزیر لعل الدین آریوبي د ښار جوړولو او ځمکو وزارت سرپرست وزیر محمود کرزي سره وکتل؛ د شهیدانو ورثې او معولیت لرونکو وګړو ته د ځمکو ورکړې او اسایشګاوو جوړولو په اړه یې خبرې وکړې.
ښاغلي آریوبي وویل، چې ځینو معلولیت لرونکو وګړو او د شهیدانو ورثې ته پخوا د کورونو لپاره ځمکې وېشل شوې وې، خو د نامناسب موقعیت له امله یې مطلوبه نتیجه ور نه کړه او دغه قشر لا هم د سرپناه شدیدې ستونزې سره مخامخ دی. د دې تر څنګ جمهور رییس امر کړی و، چې اړوندې ادارې دې معلولینو او د شهیدانو ورثې ته په ولایتونو کې د اسایشګاوو او کورونو جوړولو او دې قشر ته د تیارو کورونو جوړولو د ورکړې په موخه تیپیکې نقشې جوړې کړي. ښاغلي آریوبي زیاته کړه، چې د سولې مشورتي لویې جرګې د پرېکړه لیک د ۱۷ مادې سره سم دې جګړه ځپلو ته د زده کړو، ښوونځیو جوړولو او نورو برخو کې اسانتیاوې رامنځته او دوی ته دې رسیدګي وشي.
د ښار جوړولو او ځمکو سرپرست وزیر محمود کرزي وویل، چې د بودجې د کمښت له کبله یاد قشر ته د تیارو کورونو د ورکړې مسله په اوس وخت کې ستونزمنه ده، خو دا وزارت چمتو دی، چې په ولایتونو کې معلولینو او د شهیدانو ورثې ته د کورونو جوړولو لپاره ځمکې ووېشي. نوموړي زیاته کړه، چې استوګنیزې نمرې به نښاني، سړکونه او نورې اسانتیاوې به یې ترتیب او د وېش بهیر به یې د شهیدانو او معلولینو په چارو کې د دولت وزارت ته وسپارل شي. ښاغلي کرزي زیاته کړه، چې د اسایشګاوو د جوړولو تخمین به وکړي او د دې تر څنګ به ورته د ځمکې د تثبیت چارې هم پیل کړي، کله چې لومړني کارونه بشپړ شوه د شهیدانو او معلولینو په چارو کې د دولت وزارت ته به یې د جوړولو په اړه خبر ورکړي.
