په کنړ ولايت کې د یو شمېر مستحقو کسانو لپاره د حرفوي زدکړو پروګرام پیل شو
د کنړ ولايت د شهیدانو او معلولینو چارو رياست د مستحقو کسانو د لاسنیوي او ملاتړ په موخه د اچ، اچ، آر، ډي مرستندويه مؤسسې سره په همغږۍ د یو لړ مراسمو په ترڅ کې د (۲۸) تنو یتیمانو او معلولينو لپاره د خیاطۍ او موبایل ترمیم په حرفو کې پنځه میاشتنی روزنیز پروګرام پیل کړ.
د دې ترڅنګ د (۳۸) کونډو مېرمنو سره د اقتصادي ځان بسیاینې په برخه کې هم مرستې ترسره شوې.
د یاد روزنیز پروګرام د پرانیستلو پر مهال د کنړ ولایت د شهيدانو او معلولينو چارو رئيس محترم مفتي عبید الله حقاني د شهیدانو او معلولینو چارو وزارت رهبرۍ له ځانګړې پاملرنې او شفقت څخه د مننې ترڅنګ، له اچ، اچ، آر، ډي نړېوالې مؤسسې یې هم قدرداني وکړه، چې تل یې د ټولنې دې اړمن قشر ته لازمه پاملرنه کړې ده.
د يادونې وړ ده چې د دې پروګرام له بشپړيدو وروسته به، فارغ شويو زده کوونکو ته د حرفې اړوند وسایل په واک کې ورکړل شي او په دې سره به هغوی وکولای شي چې د خپلو کورنيو د اقتصادي ځان بسیاينې په برخه کې پوره ګټه پورته کړي.
