په ننګرهار ولایت کې پر (۳۰۰) تنو مستحقو کسانو باندې د مرستو وېش
د شهيدانو ورثه ؤ او معلولیت لرونکو وګړو د ملاتړ په موخه د کامه ریليف خیریه مؤسسې له لوري د ننګرهار ولایت د شهيدانو او معلولينو چارو رياست په همغږۍ پر (۳۰۰) تنو مستحقو یتیمانو، کونډو میرمنو او معلولینو باندې مرستې چې په هغه بېلابېل خوراکي او غیرخوراکي توکي شامل وو، ووېشل شول.
د ننګرهار ولایت د شهيدانو او معلولينو چارو رئيس محترم محمد صابر ځواک یتیمانو، کونډو او معلولینو ته یې د لازياتو مرستو پر چمتو کولو ټینګار وکړ او زیاته یې کړه: زموږ اساسي موخه د دې قشر خدمت کول او هغوی ته د ژوند اسانتیاوو برابرول دي، هڅه کوو چې د خیریه بنسټونو او مرستندویه مؤسسو په همغږۍ دوی ته لازمي مرستې برابرې شي ترڅو وکولای شو هغوی ته لازمه پاملرنه وکړو او د ژوند په چارو کې یې په ښه توګه لاسنیوی وکړو.
د یادونې وړ ده چې د مرستو د وېش پر مهال د لغمان ولايت د شهيدانو او معلولينو چارو رئيس محترم حاجي فيض الله جواد او د مؤسسې مسؤلينو هم شتون درلود.
