د سيدالشهدا ښوونځي د پېښې قربانيانو ته مرستې وويشل شوې
د سيدالشهدا ښوونځي د پېښې قربانيانو ته مرستې وويشل شوې
۳۳غویی-۱۴۰۰
د شهيدانو او معلولينو چارو وزارت د COMAC مؤسسې په همکارۍ د کابل په لويديځ کې پر سيدالشهدا ښوونځي د بريد قربانيانو (۱۴) کورنيو ته د خوراکي او غير خوراکي توکو مرستې وويشلې.
د مرستو د ويش پر مهال د شهيدانو او معلولينو چارو وزارت د برنامو او همغږۍ مرستيالې صبرۍ اندړ او د COMAC موسسې استازي هم ګډون درلود.
آغلې اندړ د مرستو د ويش په اوږدو کې پر سيد الشهدا ښوونځي خونړۍ بريد دردوونکې وباله او د شهيدانو ورثې او متضررينو ته يې د غمشریکۍ او ډاډګيرنې مراتب وړاندې کړل.
نوموړې ټينګار وکړ، چې د شهيدانو او معلولينو چارو وزارت له نورو اړونده نړيوالو بنسټونو سره په همغږۍ هڅه کوي، څو د جنګ قربانيانو ته لا زياتې مرستې را جلب کړي.
همدارنګه آغلې اندړ د وزارت اړونده ادارو ته لارښوونه وکړه، چې د تثبيت پروسې، د کارتونو ويش، وثيقو او د بهرنيو تحصيلي بورسونو په ځانګړي ډول د اندونيزيا هېواد تحصيلي بورسونو کې دې د لوګر پل علم او سيدالشهدا ښوونځي پېښو قربانيانو ته لومړيتوب ورکړي او په ټولو چارو کې دې ورسره هراړخيزه همکاري وکړي.
