د شهیدانو او معلولینو چارو وزارت د څارنې او ارزونې پلاوي پروان ولايت ته سفر وکړ
د شهیدانو او معلولینو چارو وزارت د څارنې او ارزونې رئیس محترم الحاج مولوي نورالحق حقاني، په مشرۍ یو پلاوی چې په ترکیب کې د ولایتي پلانونو له تطبیق څخه د څارنې او ارزونې عمومي مدیر محترم سلیمګل شمشاد، د تهیه او تدارکاتي چارو څخه د څارنې او ارزونې مسلکي غړی محترم محمد شفیق شیرزاد او د ولایتي پلانونو له تطبیق څخه د څارنې او ارزونې مسلکي غړی محترم محمد خیبر شیرزاد شامل وو، د پروان ولایت د شهیدانو او معلولینو چارو ریاست له لوري د ترسره شویو کړنو او فعالیتونو څخه هر اړخیزه ارزونه ترسره کړه.
د ارزونې په ترڅ کې، د شهیدانو ورثه وو او معلولینو ته د اړینو خدمتونو د وړاندې کولو څرنګوالی، د هغوی د تثبیت او ثبت پروسه، د میاشتني نغدي مساعدتونو د وېش بهیر او اداري چارې له نږدې و ارزول شوې.
یاد پلاوي په روان مالي کال کې د کونډو، یتیمانو او معلولینو د مشاهدې (سروې) پروسې د ترسره شوي بهیر څخه د ډاډ ترلاسه کولو په موخه، د مرکز ترڅنګ د جبل سراج ولسوالۍ ته هم سفر وکړ، یو شمېر یتیمان او معلولین یې له نږدې وکتل او د هغوی ستونزې او غوښتنې یې واورېدې.
د څارنې په پایله کې، شته نیمګړتیاوې او ستونزې په نښه شوې او د حل په موخه یې د یاد ریاست مسؤلینو ته اړینې لارښوونې وشوې.
