د شهیدانو او معلولینو چارو وزارت او د افغانستان د برابروالي لپاره د عدالت (JEAO) مؤسسې تر منځ د هوکړه لیک لاسلیک
د شهیدانو او معلولینو چارو وزارت د شهیدانو ورثه وو او معلولینو د اقتصادي ځان بسیاینې په موخه، د (۴) لکه او (۹۵۳۶) ډالرو په ارزښت د افغانستان د برابروالي لپاره د عدالت مؤسسې سره د همکارۍ هوکړه لیک لاسلیک کړ، چې له مخې به یې، په بامیان ولایت کې د شهیدانو او معلولینو له کورنيو څخه (۱۰۵۰) تنو مستحقو کسانو لپاره د خیاطۍ او ګلدوزۍ، کرنې او د خوراکي توکو پروسس په برخو کې د حرفوي زده کړو پروګرامونه پيل شي، اړین وسایل او لوازم به ورته واخیستل شي او په اختیار کې به یې ورکړل شي، تر څو هغوی وکولای شي د کوچنیو کاروبارونو په پیلولو سره اقتصادي ځان بسیاینې ته ورسیږي.
یاد هوکړه لیک د شهیدانو او معلولینو چارو وزارت د بهرنیو اړیکو، پلان او تقنین چارو رئیس محترم ملا صدوخان حق شناس او د افغانستان د برابروالي لپاره د عدالت (JEAO) مؤسسې استازي محترم شیخ صبور محمدي ترمنځ لاسلیک شو، چې د تطبیق چارې به یې د بامیان ولایت د شهیدانو او معلولینو چارو ریاست سره په همغږۍ د (۸) میاشتو په موده کې بشپړې شي.
محترم ملا صدوخان حق شناس د هوکړه لیک د لاسلیک پر مهال د مؤسسې له مسؤلینو څخه د شهیدانو ورثه وو او معلولینو ته د پاملرنې له امله مننه او قدرداني وکړه او د مؤسسې له مسؤلینو یې غوښتنه وکړه چې د اقتصادي ځان بسیاینې په موخه د یتیمانو، کونډو مېرمنو او معلولینو لپاره نورې ورته پروژې هم پيل کړي، تر څو د هغوی اقتصادي ستونزو ته په هر اړخیزه توګه رسېدنه وشي.
د یادونې وړ ده چې تر دې وړاندې هم د شهیدانو او معلولینو چارو وزارت د یو شمېر نورو مرستندویه مؤسسو سره په ځینو ولایتونو کې د شهیدانو ورثه وو او معلولینو د اقتصادي ځان بسیاینې په موخه ورته پروژې پیل کړي دي تر څو هغوی له اقتصادي اړخه په ځان بسیا شي.
