د شهیدانو او معلولینو چارو وزارت او د (HHRD) مؤسسې ترمنځ د هوکړه لیک لاسلیک

د شهیدانو او معلولینو چارو وزارت په کابل، کندهار او ننګرهار ولایتونو کې د شهیدانو کورنيو او معلولینو لپاره د څښاک صحي اوبو د برابرولو په موخه، د (HHRD) مؤسسې سره د (۴۲) زره ډالرو په مجموعي ارزښت هوکړه لیک لاسلیک کړ، چې له مخې یې د کابل ښار اړوند د شیخ زاید په ښارګوټي کې معلولینو ته د څښاک صحي اوبه برابرېږي، په کندهار ولایت کې د څښاک اوبو چمتو کولو په موخه ژورې څاګانې کېندل کېږي او د اوبو د استخراج او دوامدارې استفادې لپاره په سولري سیسټمونو سمبالېږي او په ننګرهار ولایت کې نیمه کیندل شوې څاګانې بشپړېږي او د پمپونو په مرسته به د استفادې وړ ګرځي.

یاد هوکړه لیک د شهیدانو او معلولینو چارو وزارت د بهرنیو اړیکو، پلان او تقنین چارو رئیس محترم ملا صدوخان حق شناس او د (HHRD) مؤسسې استازي محترم انجنیر شاکر الله امین ترمنځ لاسلیک شو چې د (۵) میاشتو په موده کې به د کابل، کندهار او ننګرهار ولایتونو اړوند ریاستونو سره په همغږۍ به تطبیق شي.