د شهیدانو او معلولینو چارو په وزارت کې پر نږدې دوه سوه او دیرش بېوزلو کورنېو باندې نغدي مرستې وویشل شوې

د شهیدانو او معلولینو چارو په وزارت کې پر نږدې (۲۳۰) بېوزلو کورنیو باندې نغدي مرستې وویشل شوې، یادې نغدي مرستې د هغه خیریه بنسټ لخوا چې نه یې غوښتل نوم یې واخیستل شي په (۱۵۸) یتیمانو او (۶۶) کونډو چې د هرې کونډې لپاره (۹۰۰۰) او د هر یتیم لپاره (۸۰۰۰) افغانۍ په پام کې نیول شوې وې، د شهیدانو او معلولینو چارو وزارت سره په همغږۍ پر مستحقو کسانو وویشل شوې.

د شهیدانو او معلولینو چارو وزارت د دفتر رئیس ښاغلي قاري شاه محمد دوست د یتیمانو او کونډو سره د شویو مرستو څخه خوښي څرګنده کړه او ویې ویل: دا خیریه بنسټ چې نه غواړي نوم یې په رسنېو کې خپور شي په پام کې لري تر څو د مرکز په ګډون په څلور دیرشو ولایتونو کې د شهیدانو او معلولینو چارو وزارت سره په همغږۍ، په هرو دریو میاشتو کې یو ځل ورته مرستې د یتیمانو او کونډو کورنېو سره ترسره کړي.