د شهیدانو او معلولینو چارو وزارت د ولایتي آمرینو د همغږۍ او وړتیا لوړونې درې ورځنی ورکشاپ پیل شو

د شهیدانو او معلولینو چارو وزارت د ولایتي آمرینو د همغږۍ او وړتیا لوړونې درې ورځنی ورکشاپ پیل شو

نن یکشنبه د (وري میاشتې ۸ نېټه) د شهیدانو او معلولینو چارو وزارت د ولایتي آمرینو د همغږۍ او وړتیا لوړونې درې ورځنی ورکشاپ د شهیدانو او معلولینو د سرپرست وزیر پوهنمل حمید الله فاروقي په وینا رسماً پیل شو، چې د ۳۳ ولایتونو د آمرینو سربېره پکې د یاد وزارت د همغږۍ او برنامو مرستیالې صبري اندړ، د مختلفو برخو رییسانو، مشاورینو او د کمک موسسې استازو ګډون درلود.

په پیل کې ښاغلي فاروقي د شهیدانو او معلولینو چارو ټولو ولایتي آمرینو ته ښه راغلاست ووایه او دغه ورکشاپ یې د شهیدانو ورثې او معلولیت لرونکو وګړو ته د خدمتونو د لا ښه والي او پیاوړې همغږۍ د رامنځته کولو لپاره یو مهم اقدام او فرصت وګڼه وویل: دغې ادارې ته له راتلو سره یې هیله دا وه، چې د وزارت ولایتي مسولینو سره وویني او د یوې پیاوړې همغږۍ د رامنځته کېدو په موخه خپل نظرونه ورسره شریک کړي. ښاغلي فاروقي زیاته کړه، چې د شهیدانو ورثه او معلولین د ټولنې مستحق قشر دی، د هېواد او خلکو د بقا او سوکالۍ لپاره یې ډېرې قربانۍ ورکړي دي، هیله مې دا ده، چې د ټولو مسولینو له لوري دوی ته پر وخت خدمتونه وړاندې شي او په دې برخه کې هیڅ ډول ناغیړي د منلو وړ نه ده.

ښاغلي فاروقي د ولایتي مسولینو د کړنو د ستاینې تر څنګ د خدمتونو د لا ښه والي او چټکتیا لارښوونه وکړه وویل، چې دې ادارې ته د راتګ اساسي موخه یې د چارو ښه تنظیم او د یاد قشر په ژوند کې د هر اړخیز بدلون رامنځته کول دي. ښاغلي فاروقي څرګنده کړه، چې د وزارت ټولې لاسته راوړنې د مرکزي او ولایتي مسولینو د هڅو او زیار پایله ده او د مشترک کار، ژمنتیا او تعهد پر بنسټ دغه لاسته راوړنې نورې هم پراخېدای شي.

ښاغلي فاروقي د وزارت ارتقاء د شهیدانو ورثې او معلولینو ته د جمهور رییس او دولت ځانګړې پاملرنه وګڼله او ټولو مسولینو ته یې د دې لاسته راوړنې د مبارکۍ ویلو تر څنګ څرګنده کړه، چې دولت د شهیدانو او معلولینو قربانیو ته په بې ساري درنښت قایل دی، نه یوازې دا چې قربانۍ به یې هېرې کړي بلکې کورنیو ته به یې د دوی حقوق او نور امتیازات پر خپل وخت ورکړي. ښاغلي فاروقي ولایتي آمرینو ته هم لارښوونه وکړه، چې د ټولو شهیدانو کورنیو او معلولینو ته د خدمتونو وړاندې کولو برخه کې د خپلو کړنو پر څرنګوالي بیاکتنه وکړي او نوو پلانونو سره یې ستونزو ته رسېدنه وکړي.

ښاغلي فاروقي په ۱۳۹۹ کال کې د وزارت لاسته راوړنې د شهیدانو ورثې او معلولینو لپاره ګټورې وګڼلې او په ۱۴۰۰ کال کې یې د مهمو کارونو د نهايي کېدو او تطبیق په اړه هم خبرې وکړې وویل، چې د قوانینو د تعدیل، د معلولیت لس کلنې ملي ستراتېژۍ او عمل پلان، د هېواد په کچه د شهیدانو او معلولینو د اسنادو او وثیقو د څېړنې او ارزنې بهیر او نوي برېښنایي سیستم د تطبیق او نهایي کېدو چارې په چټکۍ روانې دي.

ښاغلي فاروقي اداري اصلاحات، فساد سره مبارزه او ښه حکومتوالي د ژنیو کنفرانس له مهمو ژمنو وګڼل، ټولو مسولینو ته یې لارښوونه وکړه، چې په دې اړه د عالي مقام او وزارت مقام ټول فرامین، احکام په خپل وخت ځواب او جدي تعقیب شي. د دې تر څنګ یې فساد سره مبارزه او روڼتیا ټینګښت ستر مسولیت وګڼه او د بایومتریک او برېښنایي تذکرو بهیر نهایي کول یې اړین وبلل.

ښاغلي فاروقي په ولایتونو کې د شهیدانو ورثې ته احترام او ښه سلوک باندې تاکید وکړ، جنیستي مساوات او د معلولینو ګمارنه یې مهم وګڼل، دولتي او غیر دولتي ادارو سره د لاسلیک شوو هوکړه لیکونو په تطبیق، ولایتونو کې د اسایشګاوو جوړولو، ولایتي آمریتونو ته د کاري دفترونو جوړولو، او هر اړخیزې همغږۍ ټینګار وکړ.

ښاغلي فاروقي په ۱۴۰۰ کال کې د شهیدانو ورثې او معلولینو ته د حقوقو ورکړې لارښود په اړه هم خبرې وکړې وویل، چې د رهبرۍ د پرېکړو پر بنسټ جوړ شوی دی او د یاد قشر د پاتې کلونو حقوق به هم ورکړل شي.

ښاغلي فاروقي د شهیدانو او معلولینو چارو وزارت سره د ټولو دولتي، غیر دولتي، ملي او نړیوالو بنسټونو له همکارۍ او همغږۍ مننه وکړه، چې معلولیت لرونکو وګړو او د شهیدانو ورثې ته یې د خدمتونو برابرولو او ستونزو ته د رسیدګۍ برخه کې د پام وړ اقدامات ترسره کړي دي.

ښاغلي فاروقي په پای کې د وزارت او کمک موسسې له مسولینو هم مننه وکړه، چې د ورکشاپ په جوړولو کې یې همکاري وکړه او د شهیدانو کورنیو او معلولینو ته د خدمتونو وړاندې کولو برخه کې یې د موثریت رامنځته کولو لپاره مهم فرصت برابر کړ.