د شهیدانو او معلولینو چارو وزارت د رهبرۍ شورا غونډه جوړه شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر ښاغلي ملا عبدالمجید اخند په مشرۍ او د یاد وزارت د مرستیالانو او د اړوندو ادارو رئیسانو په شتون کې ترسره شوه.
دا غونډه د قرآن عظیم الشان د مبارکو آیاتونو په تلاوت سره پیل شوه.
په ننۍ غونډه کې د شهیدانو وارثینو او معلولیت لرونکو وګړو ته د ښو خدمتونو د وړاندې کولو په موخه د باالمقطع کارکوونکو د ګمارنې، همدارنګه د هغو معلولیت لرونکو وګړو په اړه چې له دوه ځایونو څخه معاش او امتیاز اخلي (هم په نورو ادارو کې په دندو ګمارل شوي او هم د دې وزارت د حقوقو او امتیازاتو څخه برخمن دي) بحث وشو، او همدا ډول په وزارتونو کې د قانون، مقرراتو او کړنلارو د بیا کتنې په اړه د ښاغلي امیرالمومنین د حکم په اساس چې د بیا کتنې په اړه راپور چمتو شي، خبرې اترې وشوې.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند د امیرالمومنین د هغه فرمان په اساس چي په ( ټولو وزارتونو کې قانون، مقررې او کړنلارې باید وڅیړل شي) په اړه خبرې وکړې او د شهیدانو او معلولینو چارو وزارت کې راپور د چمتوالي په موخه یې یو پلاوی وټاکه.
همدارنګه د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي هم د مالیې وزارت لخوا د باالمقطع کارکوونکو د منظورۍ په اړه خبرې وکړې او زیاته یې کړه، چې د وزارت له اړتیاو سره سم به باالمقطع کارکوونکي وګمارل شي.
د غونډې په پای کې د شهیدانو او معلولینو چارو وزارت د خدمتونو وړاندې کولو مرستیال ښاغلي مولوي شیخ عبدالحکیم حقاني وویل، د شهیدانو او معلولینو چارو وزارت په نوي تشکیل کې به باالمقطع کارکوونکي په دندو نه ګمارل کیږي، هغه همدارنګه د برېښنايي پیژندپاڼو د وېش بهیر په چټکتیا هم ټینګار وکړ.
