د شهيدانو او معلولينو چارو وزارت سره د شوې هوکړې له مخې به معلولينو ته کاري غرفي وويشل شي
د شهيدانو او معلولينو چارو وزارت سره د شوې هوکړې له مخې به معلولينو ته کاري غرفي وويشل شي
نن يکشنبه د چنګاښ په ۶مه، د شهيدانو او معلولينو چارو د ملاتړ او خدمتونو وړاندې کوونکې مرستيالې جميلې نورستانۍ د کابل ښاروالۍ رياست د ټولنيزو او کلتوري چارو مرستيال سرڅيړونکي محمد فاضل شريفي سره ناسته وکړه او معلوليت لرونکو وګړو ته د کاري غرفو د ويش په تړاو يې ورسره خبرې وکړې.
په پيل کې آغلې نورستانۍ د کابل ښار په ۲۲ ناحيو کې د معلوليت لرونکو وګړو لپاره د کاري غرفو د ويش پر چټکوالي ټينګار وکړ او له کابل ښاروالۍ يې په دې برخه کې د همکارۍ او لاسنيوي غوښتنه وکړه.
د آغلې نورستانۍ په خبره، چې د معلوليت لرونکو وګړو د بې کارۍ ستونزه جدي ده او د حل لپاره يې د ښاروالۍ په ګډون ټولې دولتي ادارې يو ډول مسووليت او مکلفيت لري.
ورپسې ښاغلي شريفي په هېواد کې بې کاري د هېوادوالو لپاره ننګونکې وبلله او په ځانګړي ډول يې د معلوليت لرونکو وګړو د ژوند په تړاو يې ژوره اندیښنه وښوده.
د نوموړي په خبره، چې د شهيدانو او معلولينو چارو وزارت سره د يوه ښه همکار او ددې قشر پر وړاندې د مسوول ارګان په توګه د ښاروالي رياست هڅه کوي، چې د دوی لپاره د شته امکاناتو څخه په ګټنې د کاري زمينو په هکله اړين ګامونه واخلي.
ښاغلي شريفي څرګنده کړه، چې د ښاروالۍ رياست د نوې تګلارې تر بشپړيدو وروسته به د نويو ميکانيزمونو او برېښنايي سيسټم پر بنسټ، د لاس پلورونکو نومليکنه پيلوي او د شهيدانو او معلولينو چارو وزارت سره د شوې هوکړې او په قانون کې د معلوليت لرونکو وګړو لپاره د ورکړل شوې ونډې له مخې به د نورو هېوادوالو ترڅنګ، دوی ته هم د کابل ښار په بېلابېلو برخو کې کاري غرفې وويشي.
