د شهیدانو ورثې او معلولیت لرونکو وګړو ته د کابل ښاروالۍ له لوري د غرفو د ویش پروسې پر چټکتیا خبرې وشوې
د شهیدانو ورثې او معلولیت لرونکو وګړو ته د کابل ښاروالۍ له لوري د غرفو د ویش پروسې پر چټکتیا خبرې وشوې.
د شهیدانو او معلولینو چارو وزارت د همغږۍ او برنامو مرستیاله صبرۍ اندړ د کابل ښاروالۍ د کلتوري او ټولنیز خدمتونو مرستیال سرمحقق محمد فاضل شریفی سره وکتل.
آغلې اندړ د شهیدانو وارثینو او معلولیت لرونکو وګړو ستونزو ته د رسیدنې په موخه د ترسره کړو فعالیتونو، اصلاحاتو، سیستم جوړونې او فساد سره د مبارزې په اړه معلومات وړاندې کړه وویل، چې د معلولیت لرونکو وګړو او د شهیدانو ورثې د حقوقو ورکړې تر څنګ د دوی د ژوند د ښه والي او اقتصادي ملاتړ په موخه مختلفو برخو کې بنسټیز کارونو ته اړتیا ده، چې پایله یې باید په منځمهال او اوږدمهال کې محسوسه او د حساب وړ وي. آغلې اندړ د یاد قشر د اقتصادي پیاوړتیا په موخه کابل ښار کې د غرفو پر ویش ټینګار وکړ او ښاغلي شریفي څخه یې غوښتنه وکړه چې یاده پروسه ژر تر ژره پیل کړي. آغلې اندړ د شهیدانو وارثینو او معلولیت لرونکو وګړو ته د غرفو د ویشلو په مو د دواړو ادارو ترمینځ د لاسلیک شوی هوکړه لیک د تطبیق غوښتنه هم وکړه.
ښاغلي شریفي یاد وزارت د معلولیت لرونکو وګړو او د شهیدانو ورثې د ملاتړ لپاره مهم وباله، ترسره شوي فعالیتونه یې وستایل او د نورې پراختیا هیله یې هم څرګنده کړه. ښاغلي شریفي وویل، چې معلولین او د شهیدانو وارثین د ټولنې ستر او مهم قشر دی، باید زیاته پاملرنه ورته وشي. نوموړي همدارنګه په کابل ښار کې د غرفو د ویش په اړه هم مثبت نظر وړاندې کړ او دا یې د یاد قشر بنسټیز حق وګڼه، زیاته یې کړه، چې د قانون او دواړو ادارو تر مینځ لاسلیک شوی هوکړه پر بنسټ د غرفو ویش د دوی د اقتصادي ستونزو د حل او رسیدګي په برخه کې اغېزناک ثابتېدای شي.
