د معلوليت لرونکو وګړو مدني بنسټونو د همغږۍ لپاره د ملي فدراسيون جوړيدل جدي اړتيا ده
د معلوليت لرونکو وګړو مدني بنسټونو د همغږۍ لپاره د ملي فدراسيون جوړيدل جدي اړتيا ده
د شهیدانو او معلولینو چارو سرپرست وزير ښاغلي پوهنمل حمیدالله فاروقي د شهیدانو او معلولینو په چارو کې د ولسمشر سلاکار ښاغلي عمرا خان منیب او مل پلاوي سره وکتل او د معلولینو د ملي فدراسیون د جوړېدو پر څرنګوالي يې ورسره خبرې وکړې.
ښاغلي فاروقي، د معلولینو د ملي فدراسیون د جوړیدو هرکلي ترڅنګ وویل؛ د معلولینو ملي فدراسیون رامینځته کول باید د ټولنې د واقعیتونو او اړتیاوو پر بنسټ وي او په یوه ديموکراتیکه ټولنه کې ادارې او مدني سازمانونه لومړنۍ اړتیاوې دي، څو له دې لارې يې استازي دولت او چارواکو ته د ملت غوښتنې او وړاندیزونه ورسوي.
نوموړي زیاته کړه، چې مدني بنسټونه د ټولنې هندارې دي او له دې لارې وګړي کولی شي چې له خپلو حقونو دفاع وکړي او خپل راتلونکی روښانه کړي.
ښاغلي فاروقي ټینګار وکړ، چې د معلولینو ملي فدراسیون او نورو بنسټونو ترمنځ د همغږۍ شتون اړين دی او له نيکه مرغه چې ددې فدراسيون په جوړېدو سره به معلولين د يو واحد ادرس څښتنان شي.
د شهیدانو او معلولینو چارو سرپرست وزیر ژمنه وکړه، چې د معلولیت لرونکو وګړو سره به د ياد فدراسیون د جوړیدو، انسجام ، همغږۍ او اسانتیاوو برابرولو برخو کې هر اړخيزه همکاري وکړي.
ورپسې د شهيدانو او معلولينو په چارو کې د ولسمشر سلاکار عمرا خان منیب خبرې وکړې وويل: چې د هیواد په کچه د معلوليت لرونکو وګړو ټول مدني بنسټونه، شوراګانې او اتحاديې به ددې فدراسیون تر چتر لاندې فعاليت کوي او اوس مهال یې فعالیتونه او د چارو تنظیم د معلولينو څخه جوړې شوې پنځه کاري کمیټې مخته وړي، کومې چې ټولې چاری يې پخپله د معلولینو لخوا اداره او ترسره کیږي.
د ناستې په اوږدو کې د معلولينو استازي حاجي احمدشاه اعظمي د معلولينو ملي فدراسيون د جوړيدو په هکله د عامه پوهاوي په تړاو د عمومي پلان جوړونې يادونه وکړه او د زونونو په کچه يې د سيمينارونو د دايرېدو غوښتنه وکړه.
په پای کې بيا هم ښاغلي فاروقي د معلولينو ملي فدراسيون د جوړيدو لپاره د هر اړخيز بنسټليک جوړيدل ممهم وګڼل، کوم چې مالي ملاتړ او د معلوليت لرونکو وګړو غړيتوب ددې فدراسيون د غښتلتيا او پياوړتيا سبب ګرځي.
