د فساد پر وړاندې مبارزه ګډو هڅو او همغږۍ ته اړتيا لري
د فساد پر وړاندې مبارزه ګډو هڅو او همغږۍ ته اړتيا لري
نن يکشنبه د وري په ۱۵مه، د شهيدانو او معلولينو چارو سرپرست وزير پوهنمل حميدالله فاروقي د معلولينو له يو شمير استازو سره وکتل او د هغوی ستونزې او غوښتنې يې واورېدې.
ښاغلي فاروقي په دې کتنه کې د اصلاحاتو او له فساد سره د مبارزې په برخه کې په ګډو هڅو او همغږۍ ټينګار وکړ.
نوموړي د شهيدانو له ټولو وارثینو او معلوليت لرونکو وګړو څخه وغوښتل، چې د فساد د مخنيوي او له منځه وړلو بهير کې له دوی سره همکاري وکړي.
ښاغلي فاروقي څرګنده کړه، چې وزارت د شهيدانو ورثې او معلوليت لرونکو وګړو لپاره يوازې د حقونو ورکړه او کار زمينې برابرولو په تړاو مسوول نه دی؛ بلکه ددې قشر لپاره د بنسټيزو او اړينو خدمتونو وړاندې کولو برخو کې لازم او هراړخيز مسووليت لري.
هغه زياته کړه، چې د اسنادو د سمونې او کتنې پروسې تر بشپړتيا، د برېښنايي تذکرو وېش، په برېښنايي سيسټم کې د شهيدانو ورثې او معلولينو له ثبت او راجسټر او د حقونو او امتيازاتو تر ورکړې وروسته وزارت ته د لا زياتو او بنسټيزو خدمتونو د ترسراوي فرصتونه برابرېږي.
ښاغلي فاروقي په کابل ښار کې د معلوليت لرونکو وګړو لپاره د کاري غرفو د عادلانه وېش په هکله خبر ورکړ وويل: د غرفو د وېش په تړاو د کابل له ښاروالۍ سره خبرې او همغږي شوې، د کابل ښاروالۍ د چارواکو په خبره، چې د غرفو د وېش تګلاره يې بشپړه کړې او د قانوني پروسيجرونو تر بشپړيدو وروسته به وويشل شي.
د ناستې د ګډونوالو په استازيتوب حاجي محمد حسن ساپي، د شهيدانو ورثې او معلولينو د ژوند په بېلابېلو برخو کې شته ټولې ستونزې، غوښتنې او وړانديزونه شريک کړل او د وزارت له رهبرۍ څخه يې د حل غوښتنه وکړه.
