د شهیدانو او معلولینو چارو وزارت د کورنۍ پلټنې په ریاست کې اداري غونډه ترسره شوه
د کاري بهیر د لا ښه والي او همغږۍ په موخه د کورنۍ پلټنې رئیس محترم مولوي محمد انور برادر په مشرۍ په یاد ریاست کې اداري غونډه ترسره شوه، چې په کې د ریاست اړوند آمرینو او کارکوونکو شتون درلود.
په دې غونډه کې محترم مولوي محمد انور برادر د ۱۴۰۵ مالي کال د منظور شوي پلان د اغېزمن او پر وخت تطبیق او همدارنګه په ۱۴۰۴ مالي کال کې د مرکزي او ولایتي واحدونو له لوري د ترسره شویو کړنو د تفتیش او پلټنو د پیل په اړه مفصلې خبرې او لازمې لارښوونې وړاندې کړې.
هغه کارکوونکو ته لارښوونه وکړه چې خپل کاري پلانونه په منظم او واضح ډول ترتیب کړي او له مخې یې خپلې چارې پر مخ یوسي او ټینګار یې وکړ چې د پلټنې پر مهال باید د وزارت اصولو او د رهبري شورا پرېکړو ته جدي پاملرنه وکړي، د اړوندو ریاستونو د چارو د ښه والي لپاره کارکوونکو ته لازمې او رغنده لارښوونې وکړي او په خپل منځ کې همغږي او همکاري پیاوړې وساتي، ترڅو د پلټنې چارې په منظم، شفاف او اغېزمن ډول پر مخ ولاړې شي.
همداراز د ولایتونو اړوند د شهیدانو او معلولینو چارو د تفتیش آمر محترم مخدوم ویسالدین جلیلي د پلټنې د ښه ترسراوي په موخه ګډونوالو ته لازمې لارښوونې وکړې. د غونډې نورو ګډونوالو هم د کاري استقامت له مخې خپل نظرونه او وړاندیزونه وړاندې کړل. له هر اړخیز بحث وروسته، د کورنۍ پلټنې رئيس له لوري لازمې پرېکړې وشوې.
