د شهیدانو او معلولینو چارو وزارت او د اومر ماین پاکۍ مؤسسې ترمنځ د هوکړه لیک لاسلیک

د شهیدانو او معلولینو چارو وزارت د یتیمانو، کونډو او معلولینو د ملاتړ او د هغوی د ورځینو اړتیاوو پوره کولو په موخه د اومر ماین پاکۍ مؤسسې سره د (۴۹۹) زره او (۶۲۴) ډالرو په ارزښت هوکړه لیک لاسلیک کړ، چې له مخې به یې د کابل ښار په (۱۲)، (۱۳) او (۱۶) ناحیو کې (۲۳۴۰) تنو یتیمانو، کونډو، معلولینو او اړمنو کسانو ته نغدي مرستې ووېشل شي.

د همکارۍ دا هوکړه لیک د شهیدانو او معلولینو چارو وزارت د بهرنیو اړیکو او پلان رئیس محترم ملا صدوخان حق شناس او د اومر ماین پاکۍ مؤسسې رئیس محترم الحاج فضل کریم فضل ترمنځ لاسلیک شو او د دې وزارت د ټولنیزو خدمتونو د تنظیم ریاست سره په همغږۍ به تطبیق شي.

د دې مرستو د وېش سره به یتیمان، کونډې او معلولیت لرونکي وګړي وکولای شي چې د خپل ژوند ورځينې اړتیاوې پوره کړي.