د بلخ ولایت د شهيدانو او معلولينو چارو په رياست کې اداري غونډه ترسره شوه
د چارو د لاښه سمون او مؤثریت په موخه د بلخ ولایت د شهيدانو او معلولينو چارو رئيس محترم مولوي جان محمد حکمت په مشرۍ په یاد ریاست کې اداري غونډه ترسره شوه، په دې غونډه کې د رياست اړوند ټولو کارکوونکو ګډون کړی وو.
د غونډې په پېل کې محترم مولوي جان محمد حکمت د شهیدانو ورثه وو او معلولینو د اسنادو د سروې او تصفیې پروسې د پېل پر څرنګوالي خبرې وکړې او د اړوند ریاست کارکوونکي یې په څو بېلابېلو ډلو ووېشل تر څو د شهیدانو او معلولینو چارو وزارت له منظور شوې طرحې سره سم، د یتیمانو، کونډو او معلولینو د تصفیې او سروې پروسه په منظم ډول ترسره کړي، چې د یادې پروسې له بشپړیدو وروسته به، په روان ۱۴۰۴ مالي کال کې د هغوی د میاشتنې نغدي مساعدتونو (ماهانو) د ورکړې پروسه هم پېل شي.
په دې غونډه کې له کارکوونکو څخه غوښتل شول چې په خپلو سپارل شوو دندو کې د شفافیت اصول رعایت کړي او له هر ډول فساد څخه مخنیوی وکړي.
د غونډې په پای کې د شته نیمګړتیاوو او ستونزو د حل پر لارو چارو هم خبرې وشوې او د بلخ ولایت د شهيدانو او معلولينو چارو رئيس له لوري د غونډې ګډونوالو ته لازمې لارښوونې وشوې.
