د پکتيکا ولايت د شهيدانو او معلولينو چارو په رياست کې د ښځینه مراجعینو لپاره د انتظار خونې د جوړولو چارې پېل شوې
د پکتیکا ولایت د شهیدانو او معلولینو چارو ریاست کې د ښځینه مراجعینو لپاره د اسانتیاوو رامنځته کولو په موخه، د یو لړ مراسمو په ترڅ کې د یوې عصري انتظار خونې د جوړولو چارې پېل شوې، د یادې پروژې مالي لګښت د کورنیو چارو وزیر محترم الحاج خلیفه صاحب سراج‌الدین حقاني لخوا ورکول کېږي.
په یادو مراسمو کې د پکتيکا ولايت د والي مرستیال محترم مولوي مخدوم عبدالسلام سادات، د اطلاعاتو او کلتور رئيس محترم ملا محمد امین حذیفه، د کانونو او پټرولیم رئیس مولوي نظرګل صیاد، د شهیدانو او معلولینو چارو رئيس محترم مولوي محمد نبي وهاج او یو شمېر نورو ولايتي مسؤلينو حضور درلود.
محترم مولوي محمد نبي وهاج د خليفه صاحب له ځانګړي شفقت او پاملرنې څخه مننه وکړه او دغه اقدام یې نیک او مثبت ګام وباله.
یاده انتظار خونه په عصري او معیاري ډول جوړیږي او په دې سره به، د ښځینه مراجعینو ستونزې راکمې شي.
