د شهیدانو او معلولینو چارو وزارت د مسلکي او تخنیکي چارو مرستیال محترم الحاج ملا عبدالرزاق آخند په کابل کې د قطر سفارت له مستشار سره وکتل
د مسلکي او تخنیکي چارو مرستیال محترم الحاج ملا عبدالرزاق آخند په کابل کې د قطر سفارت له مستشار محترم مردیف القشوتي سره په خپل کاري دفتر کې وکتل. د دې کتنې پر مهال د مالي او اداري چارو عمومي رئیس محترم مولوي کلیم الله افغان، د مقام د دفتر رئیس محترم مولوي شاه محمد دوست، او د پلان، پالیسۍ او بهرنېو اړیکو رئیس محترم ملا صدوخان حق شناس د اطلاعاتو او عامه اړیکو رئیس محترم مفتي فیصل خاموش هم حضور درلود.
په پېل کې محترم الحاج ملا عبدالرزاق آخند د دې وزارت له لوري یتیمانو، کونډو او معلولینو ته د خدمتونو وړاندې کولو پر څرنګوالي خبرې وکړې او زیاته یې کړه: زموږ هېواد د تېرې جګړې له امله له ګڼو ستونزو سره مخ شوی دی، چې د بېلګې په توګه، د یوه کورنۍ څخه ۳۶ تنه یتیمان او ۸ تنه کونډې هم د دې وزارت سره ثبت شوي دي، نو اړینه ده چې د ټولنې له دې اړمن قشر څخه په بشپړه توګه ملاتړ وشي.
هغه همداراز زیاته کړه: د شهیدانو او معلولینو چارو وزارت ټولو ثبت شوېو یتیمانو، کونډو او معلولینو ته د منظورې شوې بودیجې څخه د بانکي سیسټم له لارې میاشتني نغدي مساعدتونو حواله کوي.
په ورته وخت کې په کابل کې د قطر سفارت مستشار هم ژمنه وکړه چې د یتیمانو، کونډو او معلولینو ثبت شوي آمار او ارقام به د قطر هېواد د سرې میاشتې سره شریک کړي تر څو دې اړمن قشر ته په بېلابېلو برخو کې لا زیاتې مرستې چمتو او د هغوی لاسنیوی وشي.
