د شهیدانو او معلولینو په چارو کې د دولت وزارت او کابل ښاروالۍ تر دوه اړخیز هوکړه لیک لاسلیک شو
رسنیزه اعلامیه
۱۳۹۸ کال د مرغومي ۱۶
د حکومت د رسنیو مرکز- کابل
د شهیدانو او معلولینو په چارو کې د دولت وزارت او کابل ښاروالۍ تر منځ د همغږۍ او شهیدانو د وارثینو او معلولیت لرونکو وګړو د لاس پلورونکو لپاره د شل سلنه غرفو د وېش طرحې د تطبیق په موخه د همکارۍ دوه اړخیز هوکړه لیک لاسلیک شو
یاد هوکړه لیک نن د شهیدانو او معلولینو په چارو کې د دولت وزارت تخنیکي مرستیالې او د وزارت سرپرستې آغلې جمیلې نورستانۍ او کابل ښاروالۍ د ټولنیزو او کلتوري چارو معین ښاغلي محمد فاضل شریفي تر منځ د حکومت د رسنیو په مرکز کې لاسلیک شو.
د شهیدانو د وارثینو او معلولیت لرونکو وګړو د لاس پلورنې طرحې پلي کېدل چې له مخې يې د ښار شل سلنه غرفې د شهیدانو وارثینو او معلولیت لرونکو وګړو ته ویشل کیږي، دواړو خواوو ته ګټور او په دې مهم دی، چې یاد قشر ته د کار موندنې زمینه برابرېږي او تر څنګ یې د ښاري نظم په ساتنه کې د پام وړ نقش لري.
دا هوکړه لیک په اته مادو کې ترتیب شوی او دواړه خواوې یې د پلي کولو مسوولیت لري. د دې هوکړه لیک د لاسلیکولو اصلي موخه د شهیدانو وارثینو او معلولینو اړوند د لاس پلورنې طرحې تطبیق، د کابل ښار په مختلفو سیمو کې دوی ته د کااري ځای برابرول، د شهیدانو وارثینو او معلولینو په شرایطو برابرو کسانو ته د دوی د پېژندنې لپاره د وزارت له لوري د ځانګړو کارتونو وېشل، د کاري ځایونو په میاشتنیو کرایو په کمښت کې مرسته او د یاد وزارت او کابل ښاروالۍ تر منځ د ښاري نظم ساتنې په موخه د دوه اړخیزې همکارۍ او همغږۍ رامنځته کول دي.
د شهیدانو او معلولینو په چارو کې د دولت وزارت او د کابل شاروالۍ د شهیدانو د وارثینو او معلولینو د لاس پلورنې طرحې له تطبیق څخه په مشترکه او سیستماتیکه توګه څارنه او ارزونه کوي. دا هوکړه لیک دایمي دی، خو د دواړو اړخونو د اړتیا او غوښتنې پر اساس تجدید یا هم ځنډېږي.
