د کندهار ولایت د شهیدانو د ورثې او معلولیت لرونکو وګړو اړوند چارې به رڼې او چټکې شي
د کندهار ولایت د شهیدانو د ورثې او معلولیت لرونکو وګړو اړوند چارې به رڼې او چټکې شي
د شهیدانو او معلولینو په چارو کې د دولت وزیر لعل الدین آریوبي د کندهار ولایت د شهيدانو ورثې، معلوليت لرونکو وګړو استازو، قومي مشرانو او د ولايتي شورا غړو سره وکتل.
د یاد ولایت د شهيدانو د ورثې او معلولينو استازو د پاتې حقوقو ورکړې، د برېښنايي پېژندپاڼو د وېش پر چټکتیا، د روان کال د حقوقو ځنډېدو، د نمرو وېش او د اسايشګاه لپاره د امکاناتو پر زیاتېدو خبرې وکړې او خپلې ځینې ستونزې او وړاندیزونه یې شریک کړه.
ښاغلي آريوبي د کندهار د شهيدانو او معلولينو استازو څخه مننه وکړه، چې د شهیدانو د ورثې او معلولینو د ستونزو شریکولو په موخه یې تشریف راوړی دی، زیاته یې کړه: په ۱۹ کلنه جګړه کې د لوی کندهار ولسونو زياته قرباني ورکړې او ستونزو ته رسېدنه يې د وزارت لومړيتوب دی.
ښاغلي آریوبي وویل، چې د یاد ولایت د شهيدانو د هغې ورثې او معلولينو د پاتې حقوقو د ورکړې لپاره به اقدام وکړي، چې اسناد یې قانوني ستونزې ونلري او نورو ته به یې حقوق د اسنادو او وثیقو له څېړنې، برېښنایي تذکرې اخیستو او بایومتریک وروسته ورکړل شي.
ښاغلي آريوبي څرګنده کړه، چې کندهار کې د اسنادو او وثیقو څېړلو او برېښنايي تذکرو د وېش بهير چټکتيا په اړه یې مسولینو ته اړینې لارښوونې کړي دي او په دې برخه کې به بشپړه روڼتیا تامین شي.
ښاغلي آريوبي وویل، چې د کندهار د شهیدانو ورثې او معلولینو د ستونزو او وړاندیزونو اورېدو په موخه به نږدې وخت کې کندهار ته کاري سفر وکړي او ټولو اقشارو سره به جلا لیدنې ولري.
