د شهیدانو د وارثینو او معلولیت لرونکو وګړو د تېرو کلونو ( ۱۳۹۳-۱۳۹۷) د پاتې حقوقو په اړه خبرتیا
د شهیدانو د وارثینو او معلولیت لرونکو وګړو د تېرو کلونو ( ۱۳۹۳-۱۳۹۷) د پاتې حقوقو په اړه خبرتیا
د افغانستان اسلامي جمهوري دولت د اساسي قانون د (۵۳) او (۵۴) مادو د حکم پر بنسټ ځان د شهیدانو د وارثینو او معلولیت لرونکو وګړو د ملاتړ په اړه مکلف ګڼي او د هېواد د معلولیت لرونکو وګړو او د شهیدانو د کورنیو د ژوند د لومړنیو اړتیاوو د برابرولو په برخه کې یې د شهیدانو او معلولینو په چارو کې د دولت وزارت له لارې بېلابېل فعالیتونه ترسره او دا چاره دوام لري.
د شهیدانو او معلولینو په چارو کې د دولت وزارت د ۱۳۹۷ لمریز کال د دلوې میاشتې په ۲۹ نېټه د (۱۳۲) کڼې فرمان پر اساس د وزارت په توګه په کار پیل وکړ، چې د رامنځته کېدو له مهاله یې اووه میاشتې تېرېږې او د دې وزارت یوه د پام وړ برخه د هېواد د نافذه قوانینو په رڼا د معلولیت لرونکو وګړو او د شهیدانو د وارثینو د میاشتنیو حقوقو او امتیازاتو ورکړه ده، چې په کلني ډول کابو څو میلیارده افغان په بر کې نیسي.
له (۱۳۹۳) څخه تر (۱۳۹۷) لمریز کال پورې د یو زیات شمېر معلولیت لرونکو وګړو او د شهیدانو د وارثینو کلني حقوق، چې تقریباً څه باندې (۸ میلیارده) افغانۍ کېږي د بودیجې د کمښت له امله تر اوسه نه دي ورکړل شوي. کله، چې د مالیې محترم وزارت پاتې پیسې د شهیدانو او معلولینو په چارو کې د دولت وزارت ته وسپاري، دا وزارت ژمن دی، چې د پاتې کلونو پیسې په لنډ وخت کې د شهیدانو کورنیو او معلولیت لرونکو وګړو ته ورکړي.
د یادونې وړ ده، چې د شهیدانو او معلولینو په چارو کې د دولت وزارت محترمه رهبري د شهیدانو د کورنیو او معلولیت لرونکو وګړو اقتصادي ستونزې درک کوي او هڅه یې دا ده، چې څومره ژر کېدای شي د پاتې کلونو بودیجه د مالیې محترم وزارت څخه ترلاسه او دغه قشر ته خپل پاتې حقوق ورکړي. په دې اړه د مالیې محترم وزارت سره خبرې روانې دي او موږ مطمین یو، چې د خپلو نه ستړې کېدونکو هلو ځلو نتیجه به ژر ترلاسه او دغه عظیم او مستحق قشر سره به یې شریکه کړو.
ستاسې د حوصلې، صبر، زغم او هر اړخیزې همکارۍ نه مننه!
په درنښت
د شهیدانو او معلولینو په چارو کې د دولت وزارت رسنیز دفتر
