د شهیدانو او معلولینو چارو په وزارت کې د کارکوونکو د بایوګرافیک پروسې د تطبیق پر څرنګوالي غونډه جوړه شوه
یاده غونډه چې د شهیدانو او معلولینو چارو وزارت د بشري سرچینو په ریاست کې جوړه شوې وه، په هغه کې د مالي او اداري چارو عمومي رئیس محترم مولوي کلیم الله افغان، د چارو ادارې لوې ریاست د کادري چارو، اصلاحاتو او د امارتي تشکیلاتو د بیاکتنې رئیس محترم سید محمد حنفي، د بشري سرچینو رئیس محترم مولوي محمد موسی صدیقي، د بشري سرچینو د اطلاعاتو د سیسټم آمر محترم محمد حنیف حفاظ، د (HRMIS) سیسټم د پلي کولو کارپوهانو او د دې وزارت د بشري سرچینو ریاست اړوند کارکوونکو حضور درلود.
په پېل کې، د دې وزارت د مالي او اداري چارو عمومي رئیس محترم مولوي کلیم الله افغان د ډیجیټال سازۍ پروسې د روڼتیا او شفافیت په تامینولو، د اسانتیاوو رامنځته کولو او هېوادوالو ته د باکیفیته او معیاري خدمتونو وړاندې کولو په برخه کې خورا مهمه وبلله او د یادې پروسې پر پلي کولو یې ټینګار وکړ.
ورپسې د کادري چارو، اصلاحاتو او د امارتي تشکیلاتو د بیاکتنې رئیس محترم سید محمد حنفي هم د کارکوونکو د استخدام او بایوګرافیک پروسې د ارزښت په هکله معلومات وړاندې کړل او زیاته یې کړه: د بایوګرافیک د پروسې پلي کول په وزارتونو او اداراتو کې د چارو د ښه والي، کیفیت لوړولو، د اداري رازونو د مصؤنیت، د خیالي بستونو او د اداري فساد د له منځه وړلو سبب ګرځي.
د دې پروګرام په ترڅ کې د بشري سرچینو رئیس محترم مولوي محمد موسی صدیقي د وزارت اړوند د مرکزي او ولایتي بستونو لپاره په پښتو او دري ژبو د دندو لایحو ترتیبول، په HRMIS سیسټم کې د کارکوونکو د سوانحو درج کول، د کارکوونکو د کاري ظرفیتونو لوړولو په موخه په بېلابېلو برخو کې د روزنیزو سیمینارونو او ورکشاپونو په لاره اچول، د کارکوونکو د معلوماتو د ثبتولو په موخه د آفلاین سیسټم جوړول یې د دې ریاست له مهمو لاسته راوړنو څخه وشمېرل او د کارکوونکو د بایوګرافیک سیسټم د پلي کولو په برخه کې یې د پوره هڅو ژمنه وکړه.
د غونډې په پای کې د بشري سرچینو ریاست اړوند کارکوونکو ته د بایوګرافیک/ د استخدام پروسې د طی مراحل کولو په هکله د پرزینټیشن له لارې هر اړخیز معلومات وړاندې شول.
