د شهیدانو او معلولینو چارو وزیر محترم الحاج ملا عبدالمجید آخند د سویلي افریقا له یو شمېر علماوو او سوداګرو سره لیدنه وکړه
د شهیدانو او معلولینو چارو وزیر محترم الحاج ملا عبدالمجید آخند د سویلي افریقا د یو شمېر علماوو او سوداګرو سره په خپل کاري دفتر کې وکتل، د دې لیدنې پر مهال د دفتر رئیس محترم مولوي شاه محمد دوست، د کارکوونکو د چارو رئیس محترم مولوي محمد موسی صدیقي او د دعوت او ارشاد رئیس محترم مفتي عبدالاحد مسعود هم حضور درلود.
په پیل کې محترم وزیر صاحب د سویلي افریقا څخه راغلو علماوو او سوداګرو ته ښه راغلاست وویل، د یتیمانو، کونډو او معلولینو په ژوند کې شته ستونزو او اړتیاوو ته یې اشاره وکړه او ویې ویل، موږ سره داسې یتیمان او معلولیت لرونکي وګړي ثبت دي چې د خپل ژوند د لومړنیو اړتیاوو د برابرولو ترڅنګ د کورنۍ د سرپرستۍ مسؤلیت پر غاړه لري او درملنې او نورو خدمتونو ته هم جدي اړتیا لري، که د دغو کورنیو لپاره د مرستو او ملاتړ زمینه برابره شي، نو د هغوی د ژوند ډېری ستونزې به هوارې او اقتصادي وضعیت به یې ښه شي.
همداراز د سویلي افریقا څخه راغلو علماوو او سوداګرو د دې وزارت د تخنیکي او مسلکي چارو له معین محترم الحاج ملا عبدالرزاق آخند سره هم جلا لیدنه وکړه، محترم معین صاحب هغوی ته د ښه راغلاست ویلو ترڅنګ، د تېر شل کلن جهاد او له شوروي یرغلګرو سره د جهاد پر مهال د افغان ولس سره د اسلامي نړۍ د مسلمانانو د همکاریو او ملاتړ ستاینه وکړه او ویې ویل: مسلمانان د یو بل وروڼه دي او افغان ولس به هېڅکله د خپلو مسلمانانو وروڼو مرستې او همکارۍ هېرې نه کړي او د خپل وس او توان په اندازه به د هغوی د احسان او همکارۍ بدله ورکړي او د ورورولۍ دا اړیکې به لا پیاوړې کړي.
په ورته وخت کې د سویلي افریقا څخه راغلو علماوو په افغانستان کې د اسلامي نظام حاکمیت د ټول امت لپاره د خوښۍ او ویاړ ځای وباله، د افغان ولس د اوږدو کلونو قربانیو، سرښندنو او استقامت ستاینه یې وکړه او ویې ویل چې د دغو قربانیو پایله د اسلامي نظام حاکمیت دی، چې د اسلامي نړۍ د مسلمانانو زړونه یې خوښ کړي دي.
یادو علماوو همدارنګه د اسلامي امارت له مشرانو او مسؤلینو سره خپلې لیدنې د ځان لپاره لوی سعادت او ارزښتناک فرصت وباله.
همداراز د کارکوونکو د چارو رئیس محترم مولوي محمد موسی صدیقي په دې لیدنه کې وویل چې په افغانستان کې د اسلامي نظام د افغان ولس د کلونو کلونو جهاد، قربانیو، سرښندنو او نه ستړې کېدونکو مبارزو ثمره ده او د افغانستان اسلامي امارت خپلو امکاناتو ته په کتو یتیمانو، کونډو او معلولیت لرونکو وګړو ملاتړ ته ځانګړې پاملرنه کوي او هغوی ته میاشتني نغدي مساعدتونه برابروي.
