د شهیدانو او معلولینو چارو وزارت یتیمانو ته په ټولنه کې د ښه ژوند برابرولو په موخه، د پوهنې څخه د افغانانو ملاتړ مؤسسې سره هوکړه لیک لاسلیک کړ
د دې هوکړه لیک پر پلي کیدو به، په مزارشریف ښار کې د حضرت ابوهریره (رض) د یتیم خانې د بیارغونۍ چارې بشپړې او د امکاناتو له اړخه به تجهیز او تمویل شي، چې په دې سره به (۱۰۴) تنو یتیمانو ته د ژوند لومړنۍ اسانتیاوې برابر شي.
یاد هوکړه لیک د شهیدانو او معلولینو چارو وزارت د بهرنېو اړیکو او پلان رئیس محترم ملا صدوخان حق شناس او د پوهنې څخه د افغانانو ملاتړ مؤسسې مسؤل محترم عبدالرحیم نظام ترمنځ لاسلیک شو.
محترم ملا صدو خان حق شناس د یاد هوکړه لیک د لاسلیک پر مهال د مؤسسې له مسؤل څخه مننه وکړه او له هغه یې وغوښتل تر څو یتیمانو، کونډو او معلولینو ته خپلې مرستې له دې وزارت سره په همغږۍ ترسره کړي او په دې ترتیب سره به مرستې واقعي مستحقینو ته ورسیږي.
په ورته وخت کې محترم عبدالرحیم نظام هم د خپلې مؤسسې د فعالیتونو په هکله خبرې وکړې او یاد قشر ته یې د مرستو د چمتو کولو په برخه کې د پوره همکارۍ ډاډ ورکړ.
د یادونې وړ ده چې د یادې پروژې ټولیز ارزښت (۱۲) زره او (۶۱۴) امریکایي ډالره دې چې په بلخ ولایت کې به تطبیق شي.
