د شهیدانو او معلولینو چارو وزارت د مرکزي مفتشینو ګروپ آمر معرفي او په کار یې پیل وکړ
په هغه غونډه کې چې په همدې موخه د شهیدانو او معلولینو چارو وزارت کې جوړه شوې وه په هغې کې د بشري سرچینو رئیس محترم مولوي محمد موسیٰ صدیقي، د داخلي تفتیش رئیس محترم مولوي احسان الله حقاني، د څارنې او ارزونې رئیس محترم مولوي نورالحق حقاني، د دعوت او ارشاد رئیس محترم مفتي عبدالاحد مسعود او د اړوند ریاست کارکوونکو ګډون درلود.
مولوي سیدولي حماد د شهیدانو او معلولینو چارو وزارت د مقام د لزوم دید او هدایت پر اساس د داخلي تفتیش په ریاست کې د مرکزي مفتشینو ګروپ د نوي آمر په توګه د یاد وزارت د بشري سرچینو رئیس محترم مولوي محمد موسیٰ صدیقي لخوا کارکوونکو ته وروپیژندل شو.
په دې غونډه کې د بشري سرچینو رئیس محترم مولوي محمد موسیٰ صدیقي د مولوي سیدولي حماد پر تېرو فعالیتونو او د شهیدانو ورثه ؤ ته د خدمتونو وړاندې کولو په اړه خبرې وکړې او له هغه یې وغوښتل چې خپل مسؤلیتونه په پوره اخلاص، ایماندارۍ، د دندو د کړنلارو او کاري پلان سره سم سرته ورسوي.
نوموړي همداراز د دندو په پرمخ وړلو کې د ټولو شته منابعو په کاراچول، د مشرانو اطاعت او د سلسلې مراتبو مراعاتول یې ضروري وګڼل او مولوي سیدولي حماد ته یې په نوې دنده کې د بریالیتوب هیله څرګنده کړه.
هغه همداراز په دې غونډه کې په اداري موضوعاتو هم رڼا واچوله او د ادارې له اړخه یې پلان او اداري مهم عناصر کارکوونکو ته تشریح کړل.
د یادولو وړ ده چې مولوي سیدولي حماد تر دې وړاندې د خوست ولایت د شهیدانو او معلولینو چارو ریاست کې د آمر په توګه دنده ترسره کړې او په دې برخه کې یې غوره خدمتونه وړاندې کړي دي.
