د شهیدانو او معلولینو چارو وزارت د اړوندو ریاستونو د ارزونې او پلټنې لړۍ پیل شوه
د شهیدانو او معلولینو چارو وزارت د مقام د هدایت پر اساس د یاد وزارت د اړوندو ریاستونو د ارزونې لپاره هیئت ګمارل شوې چې د یاد وزارت د ریاستونو د کړنو ارزونه وکړي. د یاد هیآت په ترکیب کې چې د بشري سرچینو رئیس ښاغلې مولوي محمد موسی صدیقي او د څارنې او ارزونې ریاست غړی ښاغلی مولوي خیرالله خیرخواه شامل دي، مشري به یې د شهیدانو او معلولینو چارو وزارت مشاور ښاغلی مولوي حیات الله میوند کوي، دوې به د اړوندو ریاستونو هر اړخیزه ارزونه کوي او د خپلو اجراآتو او څیړنو راپور به د وزارت مشرتابه سره شریک کوي .
د ارزونې په دې لړۍ که به د ریاستونو د کړنو او فعالیتونو د څرنګوالي، کاري پلانونو د تطبیق څرنګوالی، د وزارت د کارکوونکو اجراآت، د کارکوونکو د مسلکي مهارتونو وړتیا او همداراز یتیمانو او معلولیت لرونکو وګړو ته د ښو او غوره خدمتونو د وړاندې کولو څرنګوالې به څیړي.
د یادونې وړ ده چې د ریاستونو د فعالیتونو د ارزونې او پلټنې دغه لړۍ درې ورځې وړاندې پیل شوې ده چې تر اوسه ریاست دفتر، د اداري خدمتونو ریاست او همدارنګه د داخلي تفتیش او پلټنې ریاستونو د کړنو او فعالیتونه ارزونه شوې ده.
