د شهیدانو او معلولینو چارو وزارت او د مسلم هنډز نړیوالې مؤسسې تر منځ څه باندې (۲۱) میلیونه افغانیو په ارزښت د همکارۍ هوکړه لیک لاسلیک شو
د شهیدانو او معلولینو چارو وزارت د یتیمانو د ملاتړ په موخه، د (۲۱) میلیونه او (۵۱۰) زره افغانیو په ارزښت چې معادل یې (۳) لکه، (۱۳) زره او (۸۳۲) ډالر کېږي، د مسلم هنډز نړیوالې مؤسسې سره د همکارۍ هوکړه لیک لاسلیک کړ، د دې هوکړه لیک له مخې به (۷۰۲) تنو مستحقو یتیمانو ته په کابل، پروان، پکتیا، خوست، کونړ، لوګر، ننګرهار، غزني، میدان وردک، بلخ او کاپیسا ولایتونو کې نغدي مرستې ووېشل شي، هر مستحق یتیم به، په میاشتني ډول ځانګړې شوې نغدي مرستې چې د یوه کال مجموعه یې (۲۴۴۸۰) افغانۍ کېږي، ترلاسه کړي، دا مالي مرسته به د یتیمانو د اړتیاوو د پوره کولو او د هغوی د کورنیو د ورځنیو ستونزو پهکمولو کې اغیزمن رول ولوبوي.
د همکارۍ دغه هوکړه لیک د شهیدانو او معلولینو چارو وزارت د بهرنیو اړیکو، پلان او تقنین چارو رئیس محترم ملا صدوخان حق شناس او د مسلم هنډز نړیوالې مؤسسې رئیس محترم محمد آصف فولاد ترمنځ لاسلیک شو، چې د تطبیق چارې به یې د پورته ذکر شویو ولایتونو د شهیدانو او معلولینو چارو ریاستونو سره په همغږۍ پر مخ یوړل شي.
محترم ملا صدوخان حق شناس د هوکړه لیک د لاسلیک پر مهال د مؤسسې له مسؤلینو څخه یتیمانو ته د پاملرنې له امله مننه او قدرداني وکړه او د مؤسسې له مسؤلینو یې غوښتنه وکړه چې د یتیمانو، کونډو او معلولینو لپاره نورې ورته پروژې هم ځانګړې کړي، تر څو د هغوی اقتصادي ستونزو ته په هر اړخیزه توګه رسېدنه وشي.
