د شهيدانو او معلولينو چارو سرپرست وزير د معلوليت لرونکو وګړو له يو شمېر استازو سره وکتل
د شهيدانو او معلولينو چارو سرپرست وزير د معلوليت لرونکو وګړو له يو شمېر استازو سره وکتل
دوشنبه،۳غبرګولی ۱۴۰۰
د شهيدانو او معلولينو چارو سرپرست وزير پوهنمل حميدالله فاروقي د معترضو معلولينو له يو شمیر استازو سره وليدل او د اړونده مسايلو په تړاو يې د هغوی ستونزې، غوښتنې او وړاندیزونه واوريدل.
په پيل کې د کابل معلولينو استازي حاجي احمدشاه عظيمي، د معلوليت لرونکو وګړو پر وړاندې د شته ستونزو په تړاو خبرې وکړې وويل: چې د معلوليت لرونکو وګړو له لوري د تحصن خيمې شاوخوا شپږ مياشتې تېرېږي، خو لا هم ستونزې په خپل ځای پاتې دي.
د نوموړي په خبره، چې له تحصن خيمې لګولو يې موخه د نړيوالې ټولنې، افغانستان دولت او د وزارت چارواکو ددې قشر لپاره د پام را اړول و.
نوموړي زياته کړه، چې د معلولينو لپاره د غرفو او استوګنځيو ويش، کارموندنه، زدکړې، د برېښنايي پېژندپاڼو د ويش بهير چټکتيا، د قانون تعديل، د معلوليت ملي ستراتيژۍ پلې کول او د معاشونو ورکړه هغه ستونزې دي، چې د معترضو معلولينو د تحصن خيمې د لګولو سبب ګرځيدلې دي.
د شهيدانو او معلولينو چارو سرپرست وزير پوهنمل حميدالله فاروقي د دوی له راتګ او د عدالت غوښتنې او د سیسټم منظم کولو په برخه کې له هميشنيو همکاريو مننه وکړه وويل: چې د پورته يادو شويو ستونزو د حل لپاره پوره ژمنتيا لري او ټينګار يې وکړ، چې ددې ځوریدلي قشر ټولې ستونزې بايد په همغږۍ او ګډکار سره حل شي.
ښاغلي فاروقي د نوي سيسټم د رامنځته کيدو او د اسنادو د چڼ په تړاو د معلوليت لرونکو وګړو حوصله وستايله او زياته يې کړه، چې په وزارت کې د نوي سيسټم پلي کول او اصلاحاتو راوستل به په چارو کې د فساد مخنيوی وکړي او پر بنسټ به يې حق حقدار ته وسپارل شي.
د نوموړي په خبره، چې د پورتنيو ستونزو د حل په موخه هره ورځ له بېلابېلو اړونده ادارو سره ناستې کوي.
