د برېښنايي پېژندپاڼو د ويش بهير دې چټک شي
د برېښنايي پېژندپاڼو د ويش بهير دې چټک شي
نن يکشنبه د غبرګولي په دويمه، د شهيدانو او معلولينو چارو سرپرست وزیر پوهنمل حميدالله فاروقي، په وزارت کې دننه د برېښنايي پېژنډپاڼو د ويش له مرکز څخه ليدنه وکړه او ددې پروسې پر چټکتيا يې ټينګار وکړ.
ښاغلي فاروقي د برېښنايي پېژندپاڼو اخيستل د شهيدانو ورثې او معلوليت لرونکو وګړو لپاره حتمي او اړين وګڼل، څو پر بنسټ يې په چارو کې روڼتيا رامنځته او برېښنايي سیسټم پلی شي.
د نوموړي په خبره، چې د برېښنايي پېژندپاڼو اخيستو په صورت کې به د شهيدانو وارثين او معلوليت لرونکي وګړي خپل حقوق په اسانۍ او چټکه توګه ترلاسه کړي.
ښاغلي فاروقي دې مرکز ته د راغلو مراجعينو او د مرکز کارکوونکو ستونزې او غوښتنې واوريدې او د پروسې د چټکتيا په موخه يې اړونده چارواکو ته د بيړنيو او اړينو اقداماتو د ترسره کیدو لارښوونې وکړې.
___________
