احمدزیو شورا د شهیدانو او معلولینو چارو وزیر ته د همکارۍ ډاډ ورکړ
احمدزیو شورا د شهیدانو او معلولینو چارو وزیر ته د همکارۍ ډاډ ورکړ
د احمدزیو سرتاسري شورا مشرتابه، یو شمېر غړو او قومي مشرانو د شهیدانو او معلولینو چارو سرپرست وزیر پوهنمل حمید الله فاروقي سره وکتل.
د احمدزیو سرتاسري شورا رییس ښاغلي ډاکټر نقیب الله احمدزي په پیل کې د شهیدانو او معلولینو چارو د سرپرست وزیر د ټاکل کېدو په مناسبت ښاغلي فاروقي ته مبارکي وویله او له جمهور رییس نه یې مننه وکړه، چې دغه وزارت ته یې یو وړ او تجربه کار شخص ګمارلی دی.
د یادې شورا مشرتابه او غړو ښاغلي فاروقي ته د هر اړخیزې همکارۍ او مرستې ډاډ ورکړ؛ د شهیدانو ورثې او معلولیت لرونکو وګړو ته یې خدمت د ټولو مشترک مسولیت وباله.
د شهیدانو او معلولینو چارو سرپرست وزیر ښاغلي فاروقي د یادې شورا له مشرتابه او غړو له هر اړخیزې همکارۍ مننه وکړه وویل، چې لومړیتوب یې دغه قشر ته خدمت او د ژوند د ښه والي په موخه د برابرو حقونو او اسانتیاوو برابرول دي. ښاغلي فاروقي زیاته کړه، چې د چارو د لا ښه والي په موخه د شهیدانو د ورثې او معلولینو سربېره د ټولنې د هر قشر مشورو ته اړتیا لري او سالمه ګټه به ترې پورته کړي.
