د شهیدانو وارثینو او معلولیت لرونکو وګړو ته د حقوقو د ورکړی په موخه د عزیزي بانک له استازو سره ناسته

د شهیدانو وارثینو او معلولیت لرونکو وګړو ته د حقوقو ورکړې په برخه کې د اسانتیا رامنځته کولو په موخه د عزیزي بانک له استازو سره ناسته ترسره شوه.

د شهیدانو او معلولینو په چارو کې ددولت وزیر ښاغلي لعل الدین آریوبي د مالیې وزارت او د عزیزي بانک له استازو سره کاري ناسته ترسره کړه. په دې ناسته کې د عزیزي بانک مسولینو ته لارښوونه وشوه چې د دوو ادارو تر مینځ د امضا شوې هوکړه لیک ټول موارد باید عملا تطبیق شي او له دې وروسته د ټولو شهیدانو وارثین او معلولین چې په عزیزي بانک کې بانکي کارت ولري، باید له دې بانک څخه په مرکز او ولایاتو کې خپل کلني حقوق په ساده، اسانه او شفافه توګه ترلاسه کړي.

عزیزي بانک سره د شهیدانو او معلولینو په چارو کې د دولت وزارت د هوکړه لیک پر بنسټ، د شهیدانو وارثین او معلولیت لرونکي وګړي له دې بانک څخه د (ATM یا په اتومات ډول د پیسو ورکړې ماشین) څخه هر مهال او هر ځای خپل حقوق ترلاسه کولای شي. همدارنګه د عزیزي بانک کارت لرونکي معلولین او د شهیدانو وارثین په ولسوالیو کې هم کولای شي د (POS) ماشینونو څخه هم خپل معاشات واخلي. د عزیزي بانک د (POS) خدمتونه د افغانستان په ۲۰۰ ولسوالیو کې فعال دي. سربېره پر دې عزیزي بانک د (SMS) یا پیغام سیستم هم فعالوي، چې د شهید د وارث یا معولیت لرونکي شخص بانکي حساب کې د پیسو له جمع کېدو سره به یې موبایل ته په اتومات ډول د خبرتیا پیغام لېږل کېږي او اړ نه دي، چې مرکز ته د خپلو معاشاتو د اخیستو لپاره راشي. دوی کولای شي په خپلو اړوندو سیمو کې یې هم ترلاسه کړي.