د شهیدانو او معلولینو چارو وزیر محترم الحاج ملا عبدالمجید آخند د سیدالشهداء حضرت حمزه رضي الله عنه خیریه بنسټ له مسؤلينو سره وکتل
د شهیدانو او معلولینو چارو وزیر محترم الحاج ملا عبدالمجید آخند نن ماسپښین د سیدالشهداء حضرت حمزه رضي الله تعالی عنه خیریه بنسټ له مسؤلينو سره ليدنه وکړه.
یاد خیریه بنسټ چې د ټولګټو چارو وزارت مرستیال محترم مولوي عبدالکریم فاتح، د اوبو او انرژۍ وزارت مرستیال محترم مجیب الرحمن عمر آخند زاده او د کار او ټولنیزو چارو وزارت د تدارکاتو رئيس محترم مولوي عبدالمتین مولوي زاده او د ځینو نورو مشرانو په نوښت رامنځته شوی، موخه یې د شهیدانو کورنیو سره د مرستو ترسره کول دي.
په دې ليدنه کې د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان، د کارکوونکو چارو رئيس محترم مولوي محمد موسی صدیقي، د ټولنیزو خدمتونو د تنظيم رئيس محترم مولوي علاؤالدين سعد او د اطلاعاتو او عامه اړیکو رئیس محترم مفتي فیصل خاموش هم حضور درلود.
په پیل کې محترم وزیر صاحب د یاد خیریه بنسټ مسؤلینو ته ښه راغلاست وویل او یادونه یې وکړه چې د شهیدانو او معلولینو چارو وزارت مسؤلين شپه او ورځ هڅه کوي چې د شهیدانو کورنیو او معلولینو ته په اغېزمن او مؤثر ډول خدمتونه وړاندې کړي.
محترم وزیر صاحب د سید الشهداء حضرت حمزه رضي الله عنه د خیریه بنسټ د خیر غوښتونکي اقدام ستاینه وکړه او ټینګار یې وکړ که د اسلامي امارت نور مشران له دې نیک اقدام څخه خبر کړل شي او هغوی په جريان کې واچول شي، بې له شکه به د شهیدانو ورثه وو لپاره اړینې مرستې برابرې کړي.
همدارنګه د سیدالشهداء حضرت حمزه رضي الله عنه خیریه بنسټ مسؤلینو هم د خپل بنسټ د فعالیتونو په اړه معلومات وړاندې کړل او زياته يې کړه چې دغه خیریه بنسټ د اسلامي امارت د بریا وروسته د میدان وردګ ولایت په سیدآباد ولسوالۍ کې (۲۰) میلیونه افغانۍ د شهیدانو کورنیو او همداراز په نورو خیریه برخو کې د مرستو او کومکونو په توګه ترسره کړي دي.
محترم مجیبالرحمن عمر آخندزاده هم وویل چې د شهیدانو او معلولینو چارو وزارت هڅې او فعالیتونه د شهیدانو او معلولینو د کورنیو ستونزو د حل په برخه کې د قدر وړ دي او وزارت په دې لار کې لوی کارونه ترسره کړي دي.
همداراز په دې ليدنه کې د مالي او اداري چارو عمومي رئیس محترم مولوي کلیم الله افغان وویل: مسلمان یوازې باید د خپل ځان په اړه فکر ونکړي، بلکې د نورو خلکو د مشکلاتو او اړتیاوو په اړه هم پاملرنه ولري.
هغه د دې وزارت په فعالیتونو کې د شفافیت یادونه وکړه او زياته یې کړه چې د یتیمانو، کونډو او معلولینو لپاره میاشتني نغدي مرستې په بشپړ شفاف ډول ورکول کېږي.
محترم مولوی کلیمالله افغان وویل چې وزارت د بودیجې پر اساس په مرکز او ولایتونو کې میاشتني نغدي مساعدتونه د بانکي سیسټم له لارې د یتیمانو، کونډو او معلولینو سره ترسره کوي.
