شهیدانو او معلولینو چارو وزارت د څارنې او ارزونې په ریاست کې اداري غونډه جوړه شوه
د شهيدانو او معلولينو چارو وزارت د څارنې او ارزونې رئيس محترم مولوي نورالحق حقاني په مشرۍ په یاد ریاست کې اداري غونډه ترسره شوه، په یاده غونډه کې د پروژو د تطبیق څخه د څارنې او ارزونې آمر محترم ملا مطیع الله ابوالمختار، د راپورونو د تحلیل او توحید آمر محترم مولانا نورالدین صاحبزاده او اړوند کارکوونکو ګډون کړی وو.
په دې غونډه کې محترم مولوي نورالحق حقاني په مرکز او ولایتونو کې یتیمانو، کونډو او معلولینو ته د میاشتني نغدي مساعدتونو د ورکړې پروسې د څارنې او ارزونې پر څرنګوالي، د څارنې او ارزونې ریاست اړوند میکانیزم پر جوړښت، د اړوندو ریاستونو د څارنې او ارزونې په موخه د چک لیستونو پر بډایه کولو او په یو لړ نورو مهمو موضوعاتو باندې خبرې وکړې.
همداراز په دې غونډه کې اړوند آمریتونو ته دنده وسپارل شوه، تر څو په روان کال کې تر دې مهاله د پلان سره سم او د پلان څخه بهر د ترسره شوېو کړنو او فعالیتونو راپور ترتیب او د ریاست سره شریک کړي.
محترم مولوي نورالحق حقاني د غونډې ګډونوالو ته سپارښتنه وکړه چې د ولایتي او مرکزي ریاستونو د فعالیتونو او کړنو د ارزونې پر مهال دې له غوره اخلاقو او ښه چلند څخه کار واخلي.
په یاده غونډه کې ګډونوالو هم خپل نظریات او وړاندیزونه شریک کړل او ورپسې د څارنې او ارزونې رئیس له لوري هغوي ته د چارو د لا ښه والي په موخه لازمې لارښوونې وشوې.
