په لغمان ولايت کې پر (۱۸۰) تنو مستحقو کسانو باندې د مرستو وېش
د لغمان ولايت د شهیدانو او معلولینو چارو رياست د (LRD) خیریه مؤسسې سره په همغږۍ پر (۱۸۰) تنو مستحقو یتیمانو باندې د خوراکي او د ژمنۍ توکو مرستې ووېشلې.
په يادو مرستو کې اوړه، غوري، وریجې او د ځینو نورو خوراکي توکو ترڅنګ ژمنۍ البسه هم شامل وه.
د مرستو د وېش پر مهال، د لغمان ولایت د شهيدانو او معلولينو چارو رياست مسؤلينو د يادې خیریه موسسې له مرستو څخه د مننې ترڅنګ څرګنده کړه، چې دا ډول بشري مرستې د یتیم ماشومانو او اړمنو کورنیو د ستونزو په کمولو کې مهم او اغېزمن رول لري او ډاډ یې وکړ چې یاد رياست تل هڅه کړې، چې د مرستو د جلب او د شفاف ویش په برخه کې خپل مسؤلیت په ښه او باوري ډول اداء کړي.
