د معلولینو د بیاځواکمنتيا په رياست کې د (۸۰) تنو معلوليت لرونکو وګړو لپاره د پوهاوي پروګرام پیل شو
د معلوليت لرونکو وګړو لپاره د پوهاوي پروګرام د معلولینو د بیاځواکمنتيا رياست له لوري د (HHRD) نړیوالې مؤسسې په مالي مرسته د دې رياست د رئيس محترم مولوي عبدالنافع منتفع په حضور کې پيل شو.
دغه ښوونيز پروګرام چې د دوو ورځو لپاره دوام مومي، د معلولیت لرونکو کسانو د پوهاوي د لوړولو په موخه تنظیم شوی دی، په دې پروګرام کې به (۸۰) تنو ته د اسلام له نظره د معلولینو د حقونو او همدارنګه د بیړنیو لومړنیو مرستو په برخه کې مهمې زدهکړې ورکړل شي.
د پروګرام په پيل کې د دې رياست د حسي او حرکي څانګې آمر محترم زاهدالله آفاقي د معلولینو د بیاځواکمتیا ریاست د فعالیتونو او کړنو په هکله هر اړخیز معلومات وړاندې کړل او زیاته یې کړه: د معلولینو د بیاځواکمنتيا رياست له لوري سږ کال (۸۹۴۳) تنو یتیمانو، کونډو او معلولینو ته په بېلابېلو برخو کې صحي خدمتونو وړاندې شوي، چې (۵۳۳۳) تنو ته په ارتوپيدي، (۱۴۵) تنو معلولینو د مصنوعي پښو جوړونې، همداراز (۲۶۶۴) تنه د فزيوتراپي او (۸۰۱) تنه نور یتیمان، کونډې او معلولین په ذهني او رواني برخو کې له صحي خدمتونو څخه برخمن شوي دي، همداراز نوموړي د اسلام مبارک دين له نظره د معلولینو د حقونو په اړه هم مفصلې خبرې وکړې.
په دې پروګرام کې محترم ډاکټر خان مایار د یاد ریاست کارکوونکي د لومړنیو مرستو په اړه ګټور معلومات وړاندې کړل. نوموړي د وینې فشار، د ټپونو او د مار چیچلو پر وخت د لومړنيو مرستو او اړینو اقداماتو د ترسره کولو په هکله ګډونوالو ته مهمې لارښوونې وکړې.
د یادونې وړ ده چې د ګډونوالو سره یوه اندازه نغدي مرسته هم ترسره شوه.
