وزیر دولت در امور شهدا و معلولین جلالتماب لعل الدین اریوبی با ۲۲ مسولین موسسه های کمک کننده دیدار نمود.
معلولیت لرونکو وګړو ته باید محسوس او مثبت خدمتونه وړاندې شي، لعل الدین اریوبي
نن سه شنبه (د چنګاښ ۱۱) د شهیدانو او معلولینو په چارو کې د دولت وزیر جلالتماب لعل الدین اریوبي په مشرۍ د ۲۲ کورنیو مرستندویه موسسو له مسولینو سره د وزارت د کنفرانسونو په تالار کې ناسته ترسره شوه.
دا موسسې د معلولیت لرونکو وګړو په برخه کې فعالیت کوي او دوی ته د ژوند په مختلفو اړخونو کې خدمتونه وړاندې کوي.
په پیل کې ښاغلي اریوبي د یادو موسسو مسولینو او استازو ته ښه راغلاست ووایه، خوښي یې څرګنده کړه، چې ډېره موده وروسته یو ځل بیا معلولیت لرونکو وګړو ته د خدمت په موخه په یوه مېز سره راټول شوي یو.
ښاغلي اریوبي د یاد وزارت او مرستندویه موسسو تر منځ د کاري همغږي پر رامنځته کېدو او زیاتېدو تاکید وکړ زیاته یې کړه، چې یادې موسسې باید خپل ټول فعالیتونه د شهیدانو او معلولینو په چارو کې د دولت وزارت له لارې، چې یو رسمي دولتي نهاد دی، په ښه توګه ترسره او د خپلو فعالیتونو راپورونه وخت پر وخت په منظم ډول یاد وزارت سره شریک کړي، تر څو پایله یې ټولو ته روښانه، مثبته او محسوسه وي.
د دغو مرستندویه موسسو مسولینو له جلالتماب وزیر څخه مننه وکړه، چې د داسې یوې مهمې غونډې فرصت یې رامنځته کړ او دا به د کاري همغږۍ په ډېرښت کې د پام وړ اغېز او رول ولري. دوی زیاته کړه، چې داسې ناستې باید دوامداره شي.
د ټولو موسسو مسولینو معلولیت لرونکو وګړو ته د خپلو مختلفو خدمتونو په اړه معلومات وړاندې کړل او ویې ویل چې ټولې چارې به د دې وزارت له لارې ترسره کوي.
پرېکړه وشوه، چې په نږدې راتلونکي کې به معلولیت لرونکو وګړو ته د ژوند په ټولو برخو کې د خدمتونو او اسانتیاوو برابرولو په موخه د یاد وزارت او موسسو تر منځ د همکارۍ دوه اړخیز هوکړه لیکونه هم لاسلیک شي.
د شهیدانو او معلولینو په چارو کې د دولت وزارت یاد قشر ته د خدمت بشپړ هوډ لري، چې د شهیدانو د حقوقو د ورکړې پروسې او د خدمتونو د برېښنایي کولو په موخه د مخابراتو او معلوماتي ټکنالوژۍ له وزارت سره د ننني هوکړه لیک لاسلیک یې ښه بېلګه ده.
