د شهیدانو او معلولینو چارو وزارت د رهبري شورا غونډه ترسره شوه
یاده غونډه د شهیدانو او معلولینو چارو وزارت د پلان او همغږۍ مرستیال مولوي عبدالرازق اخوند په مشرۍ جوړه شوه، په دې غونډه کې د 1401 مالي کال د بودجې د منظورۍ او د 1400 مالي کال بودجې د لګښت په اړه بحث او خبرې وشوې.
د بشري سرچینو رییس ښاغلي محمد موسی صدیقي د بالمقطع کارمندانو د قراردادونو د نوي کېدو په اړه بحث او خبرې وکړې او همدارنګه د کارماندانو د ID کارتونو د نوي کېدو په اړه هم تصمیم ونیول شو.
د غونډې په ترڅ کې د پیغمبر اعظم د توانبخشي رییس د شهیدانو او معلولینو چارو له مقام څخه هیله وکړه چې بهرني ډونران او خیریه بنسټونه دې ته وهڅوي چې د یاد ریاست هغه برخې چې تر اوسه فعاله نه دي فعاله کړي او همدارنګه د درملو او د مصنوعي غړو د جوړولو د مواد په برخه کې هم له دوی سره مرسته وکړي.
د غونډې په پای کې د شهیدانو او معلولینو چارو وزارت مالي او اداري چارو لوی رییس مولوی کلیم الله افغان اړوندو ریاستونو ته لارښوونه وکړه تر څو له مربوطه بانکونو څخه دې د تېرو څو کلونو د شهیدانو او معلولینو د حقوقو د ورکړې راپور وغوښتل شي.