پر کابل پوهنتون د ترهګریزې پېښې د شهیدانو کورنیو سره د اقتصادي پیاوړتیا په موخه مرستې وشوې
پر کابل پوهنتون د ترهګریزې پېښې د شهیدانو کورنیو سره د اقتصادي پیاوړتیا په موخه مرستې وشوې
د شهیدانو او معلولینو په چارو کې د دولت وزارت د جګړې قربانیانو سره د خپلو مرستو په دوام نن د کمک موسسې په همکارۍ پر کابل پوهنتون د ترهګریزې پېښې د شهیدانو له پینځو کورنیو سره د اقتصادي پیاوړتیا په موخه د کاروبار د پیلولو اړین وسایل ووېشل.
په دغو مرستو کې څلورو کورنیو ته د خیاطۍ او یوې کورنۍ ته د صرافۍ اړوند کاروبار د پیلولو ټول ضروري وسایل، چې یادې کورنۍ پر خپل اقتصاد پیاوړی کړي، شامل وو.
د شهیدانو او معلولینو په چارو کې د دولت وزارت د خدمتونو د وړاندې کولو او ملاتړ مرستیالې جمیلې نورستانۍ د کابل پوهنتون د ترهګریزې پېښې د شهیدانو کورنیو ته د تسلیت مراتبو د وړاندې کولو تر څنګ وویل، چې دغه مرستې یادو کورنیو ته د ورځني عایدموندنې لپاره مهمې دې او کولای شي د اقتصاد په پیاوړتیا کې ګټورې تمامې شي. نوموړې زیاته کړه، چې د یادې پېښې د شهیدانو نور کورنیو سره به هم دغه ډول مرستې ترسره شي.
د کمک موسسې مسولینو وویل، چې وزارت سره په همغږۍ یې د پاتې کورنیو سروې هم پیل کړې ده، چې له بشپړېدو وروسته به د اړتیا وړ مرستې ورته ووېشل شي. دوی همدا راز ډاډ ورکړ، چې دغو کورنیو ته به د خیاطۍ او عاید موندنې په نورو چارو کې د مهارتونو د لوړولو برخو کې هر اړخیزه مرسته او همکاري وکړي. زیاته یې کړه، چې د دغې پېښې اتلسو نورو کورنیو ته به هم ډېر ژر مرستې ورورسوي
