د شهیدانو او معلولینو چارو وزارت او د افغانستان د پارالمپیک کمېټې ترمنځ د همکارۍ هوکړه لیک لاسلیک شو
د شهیدانو او معلولینو چارو وزارت د مسلکي او تخنیکي چارو معین محترم الحاج ملا عبدالرزاق آخند د معلولیت لرونکو وګړو لپاره د ورزشي خدمتونو د برابرولو په موخه، د افغانستان پارالمپیک کمېټې سره د همکارۍ هوکړه لیک لاسلیک کړ.
په همدې موخه جوړ شوي پروګرام کې د پلان، بهرنیو اړیکو او تقنین چارو رئیس محترم مولوي ثناءالله فرقاني، د افغانستان د پارالمپیک کمېټې رئیس محترم محمد یوسف افتخار او د یادې کمېټې یو شمېر مسؤلینو ګډون کړی وو.
د مسلکي او تخنیکي چارو معین محترم الحاج ملا عبدالرزاق آخند د سپارل شوو مسؤلیتونو د ښه ترسره کولو پر اهمیت خبرې وکړې او زیاته یې کړه: د شهیدانو او معلولینو چارو وزارت ته د یتیمانو، کونډو او معلولیت لرونکو وګړو لپاره د خدمتونو وړاندې کولو مسؤلیت سپارل شوی او هڅه کېږي چې د یادو قشرونو لپاره د ژوند لازمې اسانتیاوې برابرې، د هغوی غوښتنو ته په ښه توګه رسېدنه وشي.
محترم معین صاحب معلولیت لرونکو وګړو ته د هغوی د خوښې وړ ورزشونو د برابرولو هرکلی وکړ او په دې برخه کې یې د وزارت له لوري د هر اړخیزې همکارۍ ډاډ ورکړ.
ورپسې د پلان، بهرنیو اړیکو او تقنین چارو رئیس محترم مولوي ثناءالله فرقاني د شهیدانو او معلولینو چارو وزارت له لوري یتیمانو، کونډو او معلولیت لرونکو وګړو ته د وړاندې کېدونکو خدمتونو په اړه معلومات وړاندې کړل. نوموړي وویل: ورزش د معلولیت لرونکو وګړو یوه اساسي اړتیا ده او د هغوی په فزیکي او روحي پیاوړتیا کې مهم رول لري.
محترم مولوي ثناء الله فرقاني زیاته کړه چې د شهیدانو او معلولینو چارو وزارت به معلولیت لرونکي وګړي د هغوی د ورزشي وړتیاوو او علاقې په پام کې نیولو سره د پارالمپیک کمېټې ته معرفي کوي، څو یاده کمېټه د هغوی لپاره د مناسب ورزش زمینه برابره کړي.
په غونډه کې د بدني روزنې او ورزش عمومي ریاست فني او مسلکي مرستیال محترم حافظ احمدجان ځډران هم د شهیدانو او معلولینو چارو وزارت له لوري یتیمانو، کونډو او معلولیت لرونکو وګړو ته وړاندې کېدونکي خدمتونه د ستاینې وړ وبلل.
نوموړي همداراز ډاډ ورکړ چې د افغانستان پارالمپیک کمېټه به د معلولیت لرونکو وګړو لپاره د ورزشي خدمتونو د برابرولو په برخه کې د شهیدانو او معلولینو چارو وزارت سره هر اړخیزه همکاري وکړي.
