په لغمان ولایت کې پر (۵۰۰) تنو مستحقو یتیمانو باندې د مرستو وېش
د لغمان ولایت د شهیدانو او معلولینو چارو ریاست د یتیمانو د ژوند د ښه والي او همداراز د هغوی څخه د دوامداره ملاتړ په موخه، د (HHRD) خیریه مؤسسې سره په همغږۍ پر (۵۰۰) تنو مستحقو یتیمانو باندې د خوراکي توکو مرستې چې په هغه کې اوړه، غوړي او ځینې نور خوراکي مواد شامل وو، په منظم او عادلانه ډول ووېشل.
د یادو مرستو د وېش پر مهال د لغمان ولایت د شهیدانو او معلولینو چارو ریاست مسؤلینو د یادې مؤسسې څخه د مننې ترڅنګ، په راتلونکي کې هم د ورته مرستو غوښتنه وکړه.
د یادونې وړ ده چې د (HHRD) خیریه مؤسسې تر دې وړاندې هم د شهیدانو او معلولینو چارو وزارت سره په همغږۍ د هېواد په ډيری ولایتونو کې زرګونو تنو یتیمانو، کونډو مېرمنو او معلولیت لرونکو وګړو ته په بېلابېلو برخو کې مرستې وېشلې دي.
