د شهیدانو او معلولینو چارو وزارت سرپرست وزیر د کابل ولایت د کاج ښوونیز مرکز مسؤل او د هزاره قوم له یو شمېر مخورو او مشرانو سره وکتل
د شهیدانو او معلولینو چارو وزارت سرپرست وزیر ښاغلي ملا عبدالمجید اخند د کابل ولایت د کاج ښوونیز مرکز مسؤل او د هزاره قوم له یو شمېر مخورو او مشرانو سره په خپل کاري دفتر کې وکتل. په دې کتنه کې د بشري سرچینو رئیس مولوي محمد موسی صدیقي، د شهیدانو چارو رئیس مولوي روح الله نصرت، او د یاد وزارت د اطلاعاتو او عامه اړیکو مسؤل مفتي فیصل خاموش هم ګډون درلود.
په پيل کې انجنیر محمد صادق جعفري د کابل ولایت د هزاره قوم د مخورو په استازیتوب خبرې وکړې او د شهیدانو او معلولینو چارو وزارت له رهبرۍ څخه یې وغوښتل تر څو هغو کسانو سره چې په دې وروستیو کې د کابل په لویدیځې څنډه کې په ښوونیزو مرکزونو کې د بریدونو له امله ژوند له لاسه ورکړې د هغوی کورنېو سره هر اړخیزې مرستې وکړي.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند د یادو مخورو او مشرانو د غوښتنو او ستونزو له اوریدو وروسته خبرې وکړې او زیاته یې کړه: د شهیدانو او معلولینو چارو وزارت اساسي موخه د شهیدانو وارثینو، کونډو او یتیمانو ته د خدمتونو وړاندې کول دي. نوموړي د کاج ښوونیز مرکز مسؤل او د کابل ولایت د هزاره قوم مخورو ته ډاډ ورکړ، چې د دوې ستونزو د حل په برخه کې به هر اړخیزه پاملرنه وشي.
په دې کتنه کې د شهیدانو او معلولینو چارو وزارت د بشري سرچینو رئیس مولوي محمد موسی صدیقي هم خبرې وکړې او زیاته یې کړه: د شهیدانو او معلولینو چارو وزارت کلک هوډ لري چې د شهیدانو وارثینو او معلولینو ته د پام وړ او پر وخت خدمتونه وړاندې کړي.
همدارنګه نوموړي د خپلو خبرو په ترڅ کې ټینګار وکړ چې د شهیدانو او معلولینو چارو وزارت د یوې مشخصې کړنلارې له مخې د یتیمانو، کونډو او معلولینو د تثبیت او پېژندنې وروسته هغوی د مرستو په نوملړ کې شاملوي.
